Bise Gobernador Papin malaban gobernador

Igwa nang malaban sa cargong gobernador contra ki Luigi Villafuerte, karibay ni Gobernador Migz Villafuerte na ultimo nang termino sa Capitolio Provincial kan Camarines Sur sa maabot na eleksyon sa Mayo 9, 2022 alagad an saiya man sanang bise gobernador Imelda Papin.

Si Papin nagpahayag na sa media kan saiyang ambisyon na mag-file kan saiyang candidatura nganing tuwadan si Villafuerte asin magcandidatong gobernador asin labanan an saiyang tugang.

Si Gob Migz, maplantiar naman kan saiyang certificate of candidacy bilang candidatong congresista kan Rinconada district laban ki Iriga City Mayor Madel Alfelor.

An saiyang candidatura sa lindong kan Partido Federal ng Pilipinas (PFP) ni dating senador Bongbong Marcos na nagsangat na kan saiyang candidatura bilang presidente alagad dai pa nag-anunciar kan saiyang ka-tandem na bise presidente.

Si Papin enot nang nagpahayag sa Bicol Mail kan saiyang ambisyon bilang gobernador alagad dai pa nagsabi kun siisay an saiyang bise gobernadora mantang sa ngunian ‘‘last two minutes’’ an saiyang pinal na desisyon.

Piglalaoman na sa laog kan duwang aldaw kukumpletohon an saiyang line-up sa mga candidatong vocal kan limang congressional district kan Camarines Sur asin posibleng an mga candidatong alcalde kan Anduyog Party iyo an saindang kaibanan na mga candidato local, alagad pighahalat an saiyang kumfirmasyon.

Si Andaya, enot nang nagsabi na dai na siya macandidatong gobernador asin nag-file na kan saiyang certificate of candidacy bilang candidatong congressman sa premir distrito kan Camarines Sur.

Si Andaya nagpahayag sa mga candidatong alcalde kan Anduyog Party na kun macandidato siyang gobernador an mawot niyang makalaban si Congresista ElRay Villafuerte kan segundo distrito kan Camarines Sur. (dpa)