BITIN!

Tigsik ko an urag-uragon na Tatay

Dati Presidente, naging mayor na lang

Napriso pa sa kabulastugan

Aw, mala ta ngonian karton na lang!

Tigsik ko an mahabas na gobyerno

Sabi, makukulong bago mag Pasko

Mararatdag na lamang an calendario

An tada anas sana paguwapo!

An sagradong buaya tigsik ko man

Sa hinabasan sa kaban nagyaman

Kan binawian nin buhay sa kinaban

Mayong pisong bitbit sa ikaduwang Buhay!

Tigsik ko man po an bilog na banwa

Grabe na baga an gama-gama

Siisay.daw an masunod na wish ni Kara

Dawa siisay basta igua, awot pa!

Tigsik ko an uminabot na bagong taon

Sa gobyerno padagos man giraray paghabon

Iba sanang sistema, iba an lawgon

An nacion mayo na talagang paglaom!

Tigsik ko man ining kagadanan

Oras na mag-abot na sa iguang pag-aram

Minadiklom an katotoohan

Kaya nabibitin an katawohan!