top of page

Biyahe sa Cabusao



Pirmeng masiram asin maogma an sakuyang biyahe sa banwaan nin cabusao. Mayo pa akong nagiromdoman na nagutom ako sa Cabusao, iyan ninhuli sa sakuyang maboot asin mahigos na Bilas, si Engineer Wally de la Cruz, sarong empleado kan Cabusao LGU. Sa resita kan sakuyang doktora na kaipuhan magduman ako sa Provincial Training and Geriatric Hospital sa San Pedro Cabusao, ini an dating Bicol Sanitarium, tanganing magsairarom sa Bone Scanning ta solamente duman sana igua nin equipo para sa siring na eksaminasyon. An mga hospital sa Naga mayo kan kagamitan sa Bone Scanning ta ini daa makamidad asin imported. Igua man kutana sa Bicol Access alagad ini naraot asin dai pa naiirahay, iyan base sa istorya nin sarong Male Nurse sa Imaging Section kan Bicol Access. Nakiturog ako nin sarong Bangui sa harong ni bilas Wally na yaon sa Brgy. New Poblacion, sa Cabusao tanganing mag mata nin amay asin magpila sa OPD kan Geriatric Hospital. Maski ngani maalungaang an panahon, ini mayong sinabi sa pig handa ni bilas na kusidong darakulang sapsap na bagong dakop sa San Miguel Bay. Antes kaming nagkaturog sa malinig na sala kan harong, liwat kong nahiling an sarong frame nin drawing sa lanob kan sala, asin ako naogma tya iyo idto an sakuyang oil pastel drawing kan Buffalo River sa America. Maogma sa pagmati na an saimong pig pagalan na drawing, ipinag mamalaki na naka display sa saindang harong. Siringman duman ko naisihan sa saindag istorya, na ibang iba na an barakalan nin sira sa pantalan kan Castillo duman sa Cabusao. Bako nang arog kan inot na panahon na, maogma asin magayon pag hilingon an pantalan tuyong pag subang nin saldang ta gulping mga sira hale sa mga parasira an piglalatag sa planggana sa baratong presyo. An mga sira sa Cabusao, iyo an makintan ma abo, pa’kan, la’piz, tabangongo, balanak, tanguigui, pusit, asin kadakol pang iba. Kaya mamundo na an mga pantalan ta nauso na maski sain na kostal sa Pilipinas, na an barakalan nin sira, ginigibo na sa tahaw kan dagat, kun kaya an solamenteng natatada iyo an saradit na sira. Antes akong maka abot sa Cabusao, nagpundo an Van sa centro kan Libmanan asin duman ko nahiling an gulping tawo sa Plaza harani sa may Munisipyo. Iguang karnabal, iguang trade fair, iguang mga pakawat bilang preparasyon sa kafiestahan kan Libmanan sa July 25. Tanganing maka pasiring sa Cabusao, kaipuhan mag arkila nin tricycle hale sa centro kan Libmanan. Nagiromdoman ko pati kan panahon ni Genova na an mga taga Cabusao, grabe an kaogmahan ta maski Bangui na puede pang maglayaw layaw sa Naga ta iguang biyaheng aircon Bus direktamente pasiring sa Cabusao. Kinaagahan, kaipuhan kong magkua nin Number tanganing magpila sa OPD kan Geriatric, alas 5 pa nin aga yaon na kami duman, alagad nagpoon an pag attender sa mga pasyente alas 7:15. Mayo nin nangyari sa sakuyang katuyuhan sa X-ray section ta an sabi kan lalaking empleado, gulpi an absent asin mayong mapa andar kan x-ray machine para sa bone scanning asin pinapabalik kami sa otro simana. Nagiromdoman ko kan panahon mi ni Atty. Celso Baguio, Station Manager kan DWRN, kun perang beses kaming nagka igua nin relief operation sa Bicol Sanitarium. Mayo na an Sanitarium asin ini pig converter sa modernong ospital. Malinig an laog, maliwanag, asin magayon an mga kagamitan, alagad sa area kan OPD asin waiting area, waratinak an mga patos nin pagkakan asin ibang basura, iyan tanda na igua pang mga tawo an osmak asin dai tataong magusar nin basurahan. Madali na an biyahe sa Geriatric Hospital, ta igua nin jeepney hale sa Barcelonita pasiring sa Sipocot asin mina agi sa ospital P25 an plete. Pag abot kan jeepney sa may tulay kan Impig, digdi kaipuhan mag baba’ an pasahero na gustong maglunad sa Van o Bus ta an terminal kan Jeepney pasiring sa laogan kan mercado. Sa biyahe ko sa Geriatric, mas pinag hinayangan ko an dati kong gawi na mag istambay asin magpasyar sa pantalan kan Castollo duman sa Cabusao. Dai ko na kaya nahihiling an mga darakula asin mga freskong sira na bagong dakop asin nababakal sa baratong presyo. Maogma an buhay sa kostal, maogma an buhay sa Cabusao.

Comentários


bottom of page