Biyahe sa Tren



An Bikolano, nabibisto sa biyahe nin tren ta mayo pa kaidto nin mga buses pasiring sa Manila. Ugali kaidto an kasabihan na nakatungtong nin riles tagalog na ta pangitorogan kan mga pobreng bikolano an maka abot sa Manila tanganing mahiling an Luneta asin an Manila Zoo na solamente nahihiling sana sa mga sinehan ni Bichara. Kaya an mga pobreng aki, kuntento na sa pag hiling kan tren sa estasyon diyan sa triangulo. Kadakol an actor sa estasyon, ini an mga mandurukot, snatcher, asin mga barombado kun kaya dapat maisog an gwardia asin mga barangay pulis. Namamaluan an triangulo na tataghan nin mga snatcher ta duman nagdadalagan an mga ini para magtago. An paktora sarong tataramon na pig uusar para ikarga sa tren an mga epektos pasiring sa Manila asin pabalik sa bikol. Mayaman kaidto an PNR ta an opisyales kaini igua nin magagayon na turugan o istaran harani sa estasyon, igua kaidto nin mga saradit na hotel sa may atubangan kan estasyon asin kadakol nin mga paratienda nin dulceng pili asin mga pasalubong. Kan panahon nin tren sa bikol, bakong madali an biyahe pasiring sa Manila sagkod nauso an mga buses asin naging karibal an tren. An mga balik-bikol na pasaheros pag abot sa estasyon medyo tagalog an pag taram ta masiramon an pagmate na siya nagtataram nin tagalog ta pinag bibiliban sa mga pagtaraid. An mga biyahero nin tren kun mina larga pasiring sa manila, dapat magpadara muna nin telegram tanganing siya sabaton sa Paco o Tutuban, siringman kan maabot sa bikol na mina telegram muna tanganing sabaton sa estasyon. An premirong larga pasiring sa Manila, pig hahatod kan kapamilya lunad nin karitela, kan iba pinapa laog sa estasyon an iba, pinapa halat sa luwas asin duman sana mina kaway kan kamot kun nag hihiro na an tren. An Paco station iyo an inot na inaagihan antes an mas matawong Tutuban harani sa Divisoria. Ako mismo nag hanga sa gayon kan PNR station sa Naga, ta ini maliwanagon, iguang musika, magayon an mga tukawan, an mga empleada garong mga teller sa banko ta sinda naka uniporme asin garo man sanang eropuerto na iguang sound system kun iguang paaboton na tren haling Manila o haling Legazpi City. An mga pasaheros nagbabakal nin tubig sa boteng de kanto na pig sasakdo sa gripo, mala ta an pagtienda nin tubig sa tren iyo an inot na trabaho ni Nora Aunor duman sa Iriga ( si Nora Aunor, naging singing champion sa Plaza Quezon sagkod na ini pinadara sa Manila asin nagpoon duman an pagigi kaining Superstar). Tanganing dai magutom sa tren, an mga bikolano iguang darang maloto sa linubluban na dahon batag, ta an panira, inasal na manok na pig babakal sa estasyon kan Sipocot. An Sipocot bistado kaidto sa manok asin aranghita. An sunod na aagihan iyo an Hundagua na yaon an Philippine Flour Mills kaya baratohon asin darakula duman an pig tetiendang ensaymada. Aga na mina agi sa parting Calamba an tren, asin ini nakikipag sabayan na sa mga yellow taxi sa parting Alabang. Kun ika premirong pag biyahe sa Manila, duman mo mahihiling an kagayonan kan Paco asin Tutuban, maninibago ka sa mga tawo na tagalog an pig tataram asin medyo pakurahaw, ta an mga bikolano malumbay magtaram kumpara sa taga Manila. Sa estorya kan mga gurangan, an tren pano-pano nin mga soldados hapones na nagsuko durante kan WW2 tanganing darahon sinda sa Manila sagkod na ipuli sa Japana. Nasibot kaidto an mga pulis sa triangulo ta an mga kotse kan tren na may lunad nin mga hapones, interong pinapaturunan nin mga gapo kan mga tawo ta gustong makabalos sa pang aabuso kan mga hapones. Dai nanggad malilingawan kan mga bikolano an magayonon na buhay sa tren, maogmahon asin maayahay maglunad sa tren. Ini an dai na experiencia kan mga bagong tubo ngonian ta sinda sa mga buses naglulunad na makalula lalo na kung mina agi sa bitukang manok. An pagbuelta sa operasyon kan PNR sa bikol sarong pangirogan kan mga bikolano na kaipuhan nanggad marealisar ta maogma an mga biyahe sa tren.