Biyaheng Pasiring Bulan

Kaiba ko an sakong amigo na si Jimmy Veneracion, banker asin dating editor kan Blue and Gold asin Maogmang Lugar kan Ateneo de Naga asin an sakuyang tugang na si Tonton nagbiyahe kami pasiring provinciang Sorsogon.

Maski mauran-uran swabe an samong biyahe sa mahiwas asin magayon na Sorsogon highway. Poon sa banwaan na Pilar nag-agui sa municipyo kan Castilla, pakaabot mi sa Sorsogon City duman kami nangudto sa sarong apartle na saderi nin sarong retiradong kapitan sa barko asin retiradong maestra. Idto na garo an pinaka-barato sa Sorsogon City, P800 an sarong aldaw, na may aircon overnight stay.

Nagsimba nguna kaming tolo sa dakulang cathedral kan ciudad kun saen naguin cura paroco si Msgr. Jorge Imperial Barlin kan Baao Camarines Sur na iyo an primerong obispong Pilipino sa nasyon. Kan siya an cura duman si Father Barlin iyo man alabis an acting mayor kan capital town.

Naglibot man kami sa mahiwas na pantalan kan ciudad na naka-atubang sa Sorsogon Bay asin nagrarakaw-lakaw kami nganing magparetrato sa manlaen-laen asin magagayon na lugar.

Namangui kami sa SM City Sorsogon asin naghimagas nin yugort saka nagpa-erahay nin cellphone duman.

Imbis na magpuli tulos sa hotel ta maamay pagka-aga pasiring Bulan, Sorsogon (64 kilometro an distansya haling Sorsogon City). Ipiglibot kami ni Tonton sa barangay Balogo kun saen ipigtutugdok an pambihira asin dakulaon na Sorsogon City Coliseum. Kataid ini kan DepEd Division Office kan Sorsogon City.

Huli ta madiklom na nag-uruli na kami sa hotel na may planong kina-agahan na lang malibot guiraray sa Coliseum.

Maogma si samuyang overnight ta nagka-erestoryahan kami ni Jimmy tungkol sa mga agui-agui mi kan panahon. Kami lang na duwa sa laog kan kuarto kan hotel ta si Tonton suway man na kuarto .

Alagad huli parehong rugado sa biyahe nagkatururog tulos kami.

Kina-agahan nin alas 5:00 pinurukawan kami ni Tonton ngarig magbyahe pasiring Bulan. Pararigos sa makusugon na bulos nin tubig tapos diretsong pamahaw sa haraning Jolibee.

Maski mauran-uran nagbiyahe kami tulos mga alas 7:30 nin aga paka-paretrato sa atubangan kan simbahan plano mi kuta na na maghapit sa Irosin o sa Bulusan ta tibaad maka-ulay mi si mga SB hermanos Y hermanas duman asin mga barkada mi duman orog na sa Balay na headquarters kan miyembros kan Sarong Banggi sa Irosin.

Maagui pa kuta na kami sa Bulusan Bay alagad sabi niya saka na lang baad pagbalik mi haling Bulan. Sa Casiguran man kuta mahapit kami ta an munisipyo duman garo Naga City Hall kadakula. Pero pinalihis mi tanganing mag-concentrar sa Bulan.

Si Jimmy na dakul nin cliente sa banko sa laog nin 6 na taon duman disganado ta kadaklan kan mga amigo niya garadanan na.

Ako man na amigo ko si Chin-Chin de Castro na secretaryo kan Sangguniang Bayan na dae mi ini naabutan ta nagpadrino palan sa sarong karasalan sa Manila.

Palibhasa mauranon dae pwede kami magpara-hiro orog na ako ta may sugkod kun maglakaw. Nagkarape kami sa sarong coffee shop kan El Jardin Hotel, nagbalyo kami para sa pangudto sa McDo kan Bulan.

Pigparadangog mi an orolay-olay duman garo standard Bikol man palan an taramon o soromaton apuera kan dikit na Bisaya na impluensya kan mga Waray na haling Samar na duman na nag-eerestar.

Paka-pangudto naghapit kami sa “Relance” an apod kan merkado o saod duman sa Bulan. Nagbakal kami nin preskong sira na bagong dakop hali sa dagat.

An mga aking alabado duman malilinig asin magalang kaya dae ka maalangan na magtao maski gurano. Nagpararetrato pa kami ni Jimmy sa mga aki.

May naheling pa kaming mag-partner na duwang teenager, nag-order nin softdrinks asin sandwich na sige an gurumulan asin turukaan sa gilid. Segun ki Jimmy dae ini makakatarapos nin pag-ereskwela, maaragoman na ini.

Si Tony asin an saiyang agom na naglamag man duman nag-aratendir sa sarong tiripon sa itaas kan hotel. Gabos na participantes kan miting tinarawan mi nin kopya nin Bicol Mail. Nagbrown-out mga alas 2:00 nin hapon, alas 4:00 na mayo pa nin kuryente. Generator lang an nag-aandar. Kaya nag-uruli na kami luway-luway sana an awto ta mauranon.

Namangui kami sa Camalig na may espesyal na pinangat. Haling Camalig puli na kami sa Naga asin Milaor. Habang nagbibiyahe an awto nagtataragoy-tagoy kami sa tuno nin kantang: “Fly mi to the moon”.

Salamat sa Mahal na Diyos sa magaya-gaya asin salvadong pagbiyahe.

(Dakul na mga prominenting tao na guikan sa Bulan, Sorsogon arog ki Senador Gringo Honasan, ex-Congressman Bonifacio Gillego, Judge Antonio Gerona, na ama ni dating Vice-President Leni Gerona Robredo, Dr. Danilo Gerona, famusong estoryador na naka-estar ngonyan sa Canaman CS, depuntong Assemblywoman Socorro de Castro, na inaon ni Chin Chin asin kadakul pang iba.

Sabi ni Jimmy an pangaran kan Bulan, Sorsogon iyo an sinabi kan mga Espanyol na bagong abot sa lugar kan hapoton an mga tao kun ano idtong lugar, an simbag: “Bulan” ta kan banguing idto bilog an bulan asin maliwanagon).