Black Friday protest vs pagsa-pribado kan ECs

Sararo an Bicol Electric Cooperative (BECA) kabale an Camarines Sur II Electric Cooperative (Casureco II) nganing ulangon an ano man na plano kan pribadong korporasyon na igwa nang nasa likod para magpadalagan kan electric cooperative (EC) siring kan nangyari sa Albay Electric Cooperative kan laogon kan Albay Power and Energy Corporation alagad ruro an serbisyo sa consumedores.


Silensyo an ginigibong Black Friday Protest kan mga opisyal asin empleados sa paagi nin pagsulat nin itum na t-shirt cada aldaw ni Viernes.


Ini an mga pahayag ni Rinner Bucay opisyal na parataram kan Casureco II na pigpuponan nang laogon kan pribadong korporasyon an Negros Island Electric Cooperative asin nagkapera pang ECs sa nasyon.

Dakulang tarpaulin sa agihan kan Casureco II na may nakalaag na BLACK FRIDAY PROTEST contra sa planong pagsa-pribado kan mga cooperativa nin electricidad. (dpa).


An Philippine Rural Electric Cooperative (Philreca) na kumpuesto nin 121 EC padagos kan saindang movimiento sa pagprotesta kan gabos na injusticia asin bakong patas na tratamiento sa mga cooperativa nin electricidad kabale digdi an Casureco II, sabi pa ni Bucay.


Saindang pigpo-protesta an dai pa nginaranan na mga higanteng pribadong korporasyon na naghihiro sagcod sa congreso nganing mag-take over alagad an ECs dai maatras kan saindang panindugan contra sa plano.


Saindang target na laogon iyo an mga ECs na nag-aatubang sa problema finansyal.


An mga cooperativa nin electricidad non-profit oriented bakong arog kan pribadong korporasyon madaling magpalumpat kan tarifa sa kuryente.


Pighalimbawa ni Bucay an nangyayari ngunian sa APEC na pigrereclamo an manijamiento sa maluyang serbisyo nagpalangkaw pa nin P4 cada kilowatt hour.


An paliog na dugang na tarifa sa APEC pig-reclamo na ni AKB party list Congressman Alfredo Garbin sa Energy Regulatory Commission.


Maging an Multi-Sectoral Stakeholders Organization an naglilibot na kan saindang signatures campaign nganing huroton sa National Electrification Administration asin Department of Energy na dapat ibalik sa dating EC o ALECO asin bawion sa APEC.


Kan Noviembre 2019 an BECA naglansar na kan saindang protesta sa Ciudad nin Iriga asin Camarines Sur contra sa planong pagsa-pribado kan lakma sa finansyal na Casureco III na planong laogon kan Bicol Light and Power Corporation matapos maaprubaran an franquicia kaini sa 3rd and final reading sa congreso.


Sa paagi kan Task Force sa ngunian nakabangon na an Casureco III na may coverage area sa Rinconada area. (dpa)