Bokal Pilapil nagdonar nin metal detector sa LGUs sa Partido Area

Ni Sonny Malate

Sa pagmakulog sa seguridad  asin   katrangkilohan kan estudiantes asin personahes sa mga escuelahan, nagdonar si Board Member JJ Pilapil nin metal detector sa  nagkakapirang local government units (LGUs) sa Partido Area.

An metal detector sarong electronic instrument na gamit sa pagdeterminar kan presencia nin metal. Sa mga mall, bangko asin ibang edificio  gamit ini kan guardia sa may entrada kan edificio para aramon  kun may nakatagong armas, arog kan badil  sa bag kan naglaog na persona. 

Sa haloy nang panahon  ini  dakulang tabang sa mga security officer tanganing mairayo an publico  sa karatan o violencia na posibleng mangyari huli sa mararaot na elemento sa sociodad.  

Manonotaran na sa campus kan mga pampublico o privadong escuelahan an nakatalaga na guardia digdi mayong gamit na metal detector sa pag duty sa saindang poste kaya nalulusatan kan mga pasaway.

Segun sa huben na board member mahalaga an pagkakaigua nin metal detector tanganing maaraman an pagkakaiguang armas arog kan badil sa mga pugosong estudiantes. 

Dagdag pa niya, huli kan violencia na nagresulta sa pagbitbit nin armas kan nagkakapirang estudiantes may mga buhay na naratdag. Ini sarong mamundo asin nakakaalarmang situacion na dapat tawan nin solusyon kan mga awtoridad.

An donasyon kan huben na board member pinaagi sa ehecutibo local asin  representantes kan LGUs.  An local na gobyerno iyo man an mapili kan mga pampublikong secondariang escuelahan na magigin recipientes kan metal detector.

Base sa oficina ni Pilapil an enot na mga banwang  nakarecebi kan gamit iyo an. Caramoan, 12 unit asin sampolo sa Goa. Siring man, an Sagñay nagkaiguang pito asin lima sa San. Jose. 

Sa mga masunod na semana magkakaigua man kan kaparehong gamit an iba pang LGUs sa cuatro distrito, dagdag kan oficina ni Pilapil. Ini tanganing maibusol an seguridad sa iba pang escuelahan.

Maroromdoman na kan mga nagtalikod na bulan nagkaiguang incidente nin violencia sa laog mismo kan escuelahan sa iba-ibang parte kan nacion. An makangirhat na incidente invuelto mismo an mga estudiantes gamit an armas na badil. 

Ini nagcausa nin pagkaalarma asin takot sa lado kan  DepEd, mga administrador asin paratukdo, mga magurang asin estudiantes mismo.  An incidente nagresultta sa pag-adaptar nin estriktong policia sa seguridad sa mga escuelahan. 

Mientrastanto, sa presente, may duwang propuestong  Bill sa Senado - An Comprehensive School Safety Act asin Sagip Bata Act - na pigpanday para  ibusol an seguridad kan mga kaakian asin estudiantes. Huli sa  beneficio sa sociodad,  ini suportado kan DepEd, mga magurang, local na gobyerno, Philippine National Police (PNP) asin comunidad.