Boladas sa Pag Presentar

Ano kaya ta naging kaugalian an pag pasikat asin magpa inom nin toda sa aldao nin pag Presentar sa karasalan. Tunay na ejemplo an pag presenter ni Fredo para mapa ngagom an saiyang nobya sa sarong Iraya. Si fredo na tubong San Vicente sa banwaan nin Libmanan, asin kan 1970 ini nag adventure sa Naga asin nakapag trabaho bilang mislador nin Harina sa sarong panaderia na yaon kaidto sa kalye Panganiban sa Ciudad nin Naga. Si Fredo binabansagan nin Fernando ta an patilla kaini sa may pisngi interong hawig ki FPJ asin kan panahon na idto, sobra an kasikatan ni Fernando Poe Jr. Sa aldao nin Sabado nakaugalian ni Fredo asin mga kapwa Panadero an magdalan nin Liberty Big Show sa Quezon Square, naka ta digdi niya nahiling an persona ni Nora Aunor, Neddie Decena, Bert Malaga asin iba ang mga kampeon sa Amateur. An mga sikat na announcer kaidto na nag titindog sa Quezon Square iyo ang mga komedyanteng sinda Nappy and Didoy, Si Susing, Si Andoy asin si Pamela. Dai pa uso an telebisyon, mayo pa an cellphone asin internet, kaya an kaogmahan kan mga trabahador iyo an magdalan nin karantahan sa Centro kan Naga. Pwera sa paghiling kan amateur, an saro pa sa katuyuhan kan mga soltero sa pag pasiring sa Plaza Quezon iyo an mag hanap nin elosyon ta gulpi nin kadaragahan an nag dadalan maski ngani mapaoy sa tabay ta tirindogan an audience. Sa perang taon na pag istambay sa Plaza Quezon, nakabisto ni Fredo an magayon asin mestisang si Libra Girl na nagtatrabaho bilang “manlililip” sa sarong sastre sa Naga. Harayo an pinag gikanan ni Libra Girl, kaipuhan maglunad nin baroto, mag baklay asin magsangkay sa pamaba ta ini sarong Iraya nin sarong harayong baryo sa Bicol. Naging mag elosyon sinda Fredo asin Libra Girl asin an simbahan kan San Francisco iyo an testigo kan saindang sagradong pagka minootan mala ta pig hahawig sinda sa romansa ninda Luis Gonzales asin Gloria Romero. Sa saindang pagsimba, naging ugali ninda an magsumpaan sa may pintuan kan San Francisco arog na sana kan pag dotdot kan mga moro sa binditadong tubig asin pig wiwirik wirik sa doros mantang nagpapanuga kan saindang dalisay na pagka minootan na huna mo mayong bongkagan. Nag abot an aldao nin Presentaran asin an gabos pig Andaman ni Fredo arog baga kan kinahon na Gin, orig, tinapay na pan amerikano, bihon, sinuman, dulce na tangkwa, konserba na lapanak asin sitsaron. Haros maghapon an biyahe kan grupo ni Fredo pasiring sa simple alagad malinig na harong ni Libra Girl. Kaibahan ni Fredo iyo an saiyang magurang, mga tugang asin mga katrabaho sa Panaderia. Magayon man an ginibong pag sabat sainda kan magurang ni Libra Girl. An mga pinsan ni Libra girl, nag arabot asin mayong ginibo iyo na pig buno an orig, pig luto nin adobo, igado, dinuguan, asin kaldereta. Haros magdamlag na irinoman nin Gin kaya sa centro kan orolay sa Presentaran, anas burat asin ribong na kaulay. Sagkod nag abot an aldao nin kasal, magayon an ingramada, yaon si Kapitan asin an mga opisyal kan Pastoral Council. Sa tahaw kan karakanan, may sarong lalaki an nagbabalinghaw, pig lalamoda an familya ni Fredo. An lalaki, pinsan ni Libra Girl na nag abot lamos nin kaburatan asin nakulangan nin karne sa plato. Anggot ini ta poros daa taba nin orig an yaon sa saiyang plato mantang aram man niya na gulping morkon asin kaldereta an yaon sa kawa sa likuran kan harong ni Libra Girl. An rason ni Fredo, parte kan saindang areglo sa Presentaran na sa karakanan o inaapod na “ baralbagan” palibhasa mga istambay asin mga bulabog an naiinot magtukaw sa lamesa, dapat si taba kan orig an iluwag ta idtong mga laman asin fried chicken iluwag sa mga kairibahan na babae kan mga Ninong asin Ninang. Kan maaraman kan mga pinsan ni Libra girl na medyo maisip an utok ni Fredo, duman nag bungkaras an borolyada, borontolan na daing siring, flying kick digdi, flying kick duman, may pig rarapado nin kawayan, an mga gurang nagdidismayo kabale na si Libra Girl. Sabi ni Father, iyo daa iyan an resulta kan Presentaran na an nag oorolay anas burat asin mayo sa toltol na pag iisip. Sa tugon ni Father sa saiyang pulpito, iyo na sa sunod na karasalan an mga taba nin orig dai na pag iba sa luwag, puede ining mantikaon ta gamiton na pang gisa nin balaw o bagaman pang hapulas nin rayuma, o kun dai man, ikaag na an mga in isa sagmawan ta iyo ini an pinag pupunan nin rambol sa kasalan. Maski siring, nag agi an mga panahon naging maogma an familya kan duwa, nag gurang na magkaibanan ninda Fredo asin Libra Girl na ngonian mas bisto sa Barangay bilang Lolo Pedong asin Lola Miting.