Bombay bawal na sa Pamplona, CS

Ini an desisyon kan lokal na gobierno kan Pamplona, Camarines Sur sa tahaw kan naglalangkaw na caso kan coronavirus disease (Covid-19) mantang ini para sa proteksyon kan namamanuan digdi huli na kaipuhan ilikay kan LGU sa ano man na posibleng pag-ulakit kan virus.

Si Alcalde Ronaldo ‘’Boy’’ Franco nagpahayag kaini nin huli ta an mga Bombay na Indian national dai mahahale an pagduda na maydarang virus huli ta kun saen-saen sinda nakaka-abot na mga municipalidad nganing singilon an mga pautang.

An ‘‘5-6’’ o negosyo sa pagpa-utang kan Bombay sa mga saradit na negosyante mayo man nin business permit sa arin man na lokal na gobierno.

An pag-estricto sa mga naglalaog na dayuhan sa banwaan nin Pamplona saro sa pig-iimplementar sa border control kan LGU nganing amay pa maaraman an mga naglalaog o returning residence kabale digdi an mga Indian national na mga Bombay.

Haros aroaldaw luwas laog sa saindang banwaan an mga dayuhan na may negosyo sa ‘‘5-6 loan’’ alagad huli kan pag-estricto sa check-point dapat suspendiron muna an pagsingil sa mga pautang sa paglikaw sa ‘‘deadly virus’’.

Pabor man sa mga may utang na negosyante nganing igilid muna an saindang pagbayad huli kan pandemya. (dpa)