top of page

BONA Foundation padagos an serbisyo sa mga Lagoyonon

Ni Sonny Malate


Pakalihis nin halawig na taon na pag-extender nin tabang sa Estados Unidos (US), kasabay sa mga kahimanwa sa Lagonoy, Camarines Sur, padagos na nagtataong asistencia sa mga Lagonoyon an Bebot and Iris Bona Foundation o BONA Foundation.


An mag-agom na Bebot asin Iris duwang taon nang  permanenteng nag-iistar sa Lagonoy asin orug pang pinahiwas an pag-extendir nin asistencia sa mga tunay na nangangaipong tabang, mantang an operasyon kan Foundation ibinalyo na sa Pilipinas.


An BONA Foundation sarong non-profit organization na pigpundar ni Rafael Generoso Miraña Bona lll sa US. Mas bistado sa gaha’ (nickname) na Bebot, an kagpundar kan Foundation sarong propiong Lagonoyon na nagprobar kan saiyang kapaladan sa ibang nacion, nag-asenso asin padagos na nagheheras kan mga nagunong biyaya sa mga kahimanwa.


Segun ki Bona, an Foundation namundag primeramente tanganing masimbagan an pangangaipo kan mga tikapong mga kamagurangan o elderly sa pangangataman kan saindang salud.


Dinagdag pa kan fundador kan Foundation na siya nagbukas nin mga medical clinic para sa mga pobreng senior citizen sa Housing Urban Development (HUD) area sa US. Nanotaran niya na an gobyerno Americano limitado an asistencia sa mga senior citizen compara sa mga hubenes asin kaakian.


Si Bona sarong electrical engineer asin may advanced studies kaini, nagtapos kan ikaduwang cursong Computer Science asin sarong Certified Financial Planner. Siya treintang (30) taon  na nagtenir sa ibang nacion. Pambihira na durante kan periodong ini, tolo hasta anom na beses sa laog nin santaon na nag-uuli siya sa Pilipinas.


Pag-uli sa Pilipinas tanganing digdi na permanenteng mag-erok, pig-ontok na ni Bona an operasyon kan Foundation sa US. Sa presente, nakatutok na an pagtaong asistencia kan Foundation sa residentes kan Lagonoy sa lado nin salud, edukasyon, pagpaharong asin pangkabuhayan.


Huli ta may especial na lugar sa puso ni  Bona an mga kaakian gikan sa mga tios na pamilya, sinda pigduduholan niya nin libreng tsinelas,  notebook, payong, kapote asin ibang gamit. An ibang mga maninigong paklasehon huli sa talento, pig-aayudahan niya tanganing makaguno nin bastanteng edukasyon.


Pigtawan doon kan kagpundar kan Foundation, na mayormente an ganada niya sa negosyo an ginigikanan kan fundo kaya limitado sana an recipiente kan ayuda. Siring man, an pigtatabangan iyo an maninigong duholan nin asistencia, nunca an mga may helang na katam o katamaran.


Tolong mga barangay an nakatutok an ayuda kan Foundation, an San Isidro Norte, San Sebastian, asin Genorangan, an sitio kan Gawad Kalinga Village.


Pigbuyagyag man ni Bona na may proponedong 100 na housing unit para sa tikapong pamilya an Foundation. Ini temporariamenteng piggilid muna mantang naghahanap nin sitio kaini. An kagrugaring kan daga na babakalon kuta para sa housing project uminatras sa barakalan sa personal na rason. Sa presente, an Foundation naghahanap nin bagong sotio.


Mientrastabto, huli sa halawig na experiencia sa empleo asin pagmamanejar nin negosyo asin sa mahiwas na pakikiiba sa iba-ibang klaseng rasa nin mga indibidwal, nanotaran ni Bona na kaipohan na pagbabago nin sistema sa kaisipan o mindset kan Pilipino tanganing makamtan an total o holistic na reforma.


Sa prangka asin diretsahan na pagtaram, sinabi niya na an dakulang helang kan gobyerno ngonian iyo an garapalan na corruption. Nanotaran niya na mamondo na kulang an napepenaran o magkaminsan mayo ngani, bakong arog sa Estados Unidos na istriktong naipapasunod an ley.


Dagdag ni Bona: dapat kan mga mahabon asin nagpapayaman sa sadiri ninda sa gobyerno an pohoon na.


Bebot M. Bona (may kapot nin sira) kan BONA Foundation,  kaibahan an mga parasira kan San Sebastion, Lagonoy, recepiente nin libreng banca. (Photo: BONA Foundation)


Comments


bottom of page