Bong Go
Dakul an nagkabirigla kan mag-anunciar si Senador Bong Go na ipigsibog niya na an saiyang kandidatura pagka presidente kan Pilipinas.
Habo daa kaya kan saiyang pamilya na magdalagan siya para pamayo kan nasyon saka habo niyang tawan nin magabat na problema an saiyang among na si Presidente Rodrigo Duterte mantag an aki kan Presidente na si Mayora Sara Duterte- Carpio kan Davao City iyo an kandidata para vice-presidente kan saiyang kalaban kuta na si dating Senador Bongbong Marcos.
Maski an publiko nasasakitan pag-intindi kan kamurugtakan na si Sen Bong Go na pinakadukot sa Presidente poon kan siya Mayor pa sa Davao sagkod ngonyan na Presidente na si Digong na magkasuruwayan sinda sa nagdadangadang na eleksyon.
May huring-huding kaya na sa sobrang kusog kan senador sa Presidente kan Pilipinas, pati an saiyang pamilya magpoon ki Mayora Sara asin ibang mga tugang kaini dai basta makadulok sa Presidente na dai ma-agui ki Bong Go. Kan i-anunciar na si Senador Go na ma presidente inibanan pa kan Presidente pagfile kan certificate of candidacy sa COMELEC orog na nagrabe an family feud.
Dai na kuta na makandidato si Mayora pagka-presidente huli kan pangyayari napiritan siyang magplantiar guiraray kan saiyang kandidatura bilang bise ni Bongbong Marcos.
An paghuna kan iba an pagkandidato pagka-presidente ni Bong Go pasiguro lang kan hepe ejecutivo ta tibaad man nanggad idescalificar si BBM bilang kandidato pagka presidente huli sa problemang dai pagplantiar nin income tax kan aki kaidtong depuntong Ferdinand Marcos Sr.
Pagmati ko nagka-igwa man guiraray pag-urulay an miyembros kan pamilya Duterte pati ni Bongbong Marcos nganing masursi an dakulang problema.
Naguiguiromduman ko kan taon 2015 kan nagpa-plano pa lang magdalagan si Digong para Presidente nadangog ko an pangaran na Bong Go sa ngimot ni Usec. Marvel Clavecilla na maski ngani an dating judge kaklase, brod sa frat asin padihon ni Digong pero pigkaka-ulay niya ngona si Bong Go, an executive assistance ni PRRD kadto tanganing ma haman an mga plano para sa Bikol kan panahon na idto.
Si ultimong pagpa Naga asin pagpa Legazpi ni Digong antes mag eleksyon kan 2016 an pigkaka-ulay ni Clavecilla asin ni Dante Jeminez kaidto iyo na si Bong Go.
Poderoso talaga asin dukot na marhay sa Presidente kaya kun siisay man an may plano magdulok ki Digong mag bonggo ngona ki Bong Go.
Kan Presidente na si Duterte si Bong Go man guiraray an nagseserveng prentera kan bagong Presidente. Pero naheling ko si mga heganteng billboards sa Naga asin sa Camarines Sur na yaon an pangaran asin lalawgon ni Bong Go, pigkuruanan ki nin retrato asin pig post ko sa facebook.
Pig-arangutan ako kan ibang taga media ta tano daa pig popost ko idto apesar na an mga billboards para ki Bong Go.
Ngalas ako ta an mga taga media dating kakampi sa kampo ni Pinoy Aquino. Dai na pati ako pigtitino kan si dati kong mga amigo.
Kan an executive assistant kan Presidente magkandidato para senador kan 2019, ako an saro sa mga nagenot na magkampanya para saiya, no money involved, sa pagtubod na kaipuhan kan Presidenteng may political will an loyalista sa laog kan senado tanganing maguibo an saiyang mga kaisipan arog kan charter change, federalismo, padagos na pagsugpo kan droga asin kurapsyon asin pagreporma kan burukrasya kan gobyerno.
Mala ta nangana an mga piling disipolos ni Digong---Go, Bato asin Tolentino. Dakul na mga programa si Duterte an dai nangyari sagkod ngonyan ta pigbonggo kan ibang mga senadores arog na Drilon, Hontiveros, Villanueva, Pangilinan asin Gordon.
Bako nang kandidato si Bong Go para presidente pero senador man guiraray siya sa 2022. Si Presidente Duterte ma senador man garo pati magana baka magtopnotcher pa asin maguin presidente kan senado susog sa plano.
Si Senador Bong Go super alalay man guiraray kan susunod na senate president. An sarong executive assistant na may abilidad asin leldtad na arog ki Bong Go kaipuhan asin nadadapat sa sarong nasyon na sobra an demokrasya siring kan Pilipinas.
Antabayanan ta.