Bongalonta buelta na sa puesto sa LGU

Pili, Camarines Sur --- Veinte diyas (20) antes kan eleksyon nasyonal asin lokal sa Mayo 9, 2022 buelta na sa puesto an elihidong alcalde sa banwaan na ini, Tomas Bongalonta matapos kan anom na bulan na suspension sa saiya ni Gobernador Migz Villafuerte huli sa casong administrativo.


Kinumfirmar sa Bicol Mail kan alcalde na poon ngunian na aldaw April 21 maasumir na siya sa posisyon hale sa nagtukaw na acting mayor Marivic Solano na buelta naman sa posisyon bilang bise alcalde.


Si Consejal Francis Belen na iyo man an nagtukaw na acting vice mayor buelta na sa trabajo bilang miembro kan Sanggunian Bayan.


Kan recibihon kan jefe ejecutivo an suspension order kan Oktubre 2021 an nagtukaw na acting mayor hinarale si mga job order na empleados apesar na dai pa natatapos an saindang contrata.


Huli kaini, nagsurat na siya sa Commission on Election asin Department of Interior and Local Government (DILG) na dapat ibalik na sinda sa dating trabajo na dinamay kan nagtukaw na acting mayor nganing mawaran nin trabajo.


Sa anom na bulan na suspension, sinabi ni Bongalonta nagbugtak man nin sadiring mga job order na empleados an acting mayor apesar na cuestionable an pagsipa sa serbisyo kan dai pa natatapos si mga contrata kan JO.


Kan nakaaging enot na termino kan jefe ejecutivo, sinuspende siya kan Capitolio Provincial huli sa caso administrasyon alagad an reaksyon kan alcalde politica an motivo kaya dai siya inuuntokan na kastigohon kan gobernador.


An caso administrativo contra sa alcalde huli kan saiyang pagnombra ki Rex Resuena bilang municipal administrator apesar na dai nag-agi sa aprubal kan Sanggunian Bayan. (dpa)