Bongalonta nagdakit nanin suporta ki Magtuto

Si suspendidong Alcalde Tomas Bongalonta na nakatalaan magbuelta bilang jefe ejecutivo kan banwaan nin Pili, Camarines Sur sa huring semana kan Abril 2023 nagkumfirmar sa Bicol Mail na saiya nang susuportaran si Nonoy Magtuto na macandidato sa cargong diputado kan tercer distrito kan Camarines Sur sa eleksyon sa 2025.

Alagad an saiyang kondisyon dai siya masuporta ki LRay Villafuerte na last termer bilang diputado kan segundo distrito kan Camarines Sur asin madalagan sa cargong gobernador sa 2025 local election.

An diputado iyo an nagsangat nin nagkaperang mga caso administrativo asin iba pang caso sa jusgado sa Quezon City kontra ki Bongalonta na iyo an mayor na dahilan kun tano ta saiyang sinisikwal an pagsuporta envez kun masuporta sa pinsan na sana ni LRay na si Nonoy Magtuto.

Saiyang pig-osipon na kan mga nakaaging semana pigbisita siya ni Magtuto sagcod na nag-ulay sa sarong restaurant sa M.T. Villanueva Ave. asin digdi na pinal nagkasundo sa politica sa masunod na eleksyon lokal.

Sinabi pa na marhay an relasyon kan saindang familia asin familia Magtuto maging si Nonoy na marhay na kaulay.

Si Magtuto amay an paglibot-libot sa mga alcalde sa tercer distrito kan Camarines Sur dawa na ngani dugay na an masunod na pirilian mantang posibleng makalaban niya si dating Bise Presidente Leni Robredo.

Dinagdag pa kan suspendidong alcalde na saiya nang enot na sinuportahan si Robredo kan magdalagan bilang diputado kan tercer distrito sagcod na mapalaban sa eleksyon presidential.

Dai man piglinaw kun igwang dahilan an saiyang pagtalikod sa partido kan dating bise presidente. (dpa)