‘‘Bookies’’ karibay kan jueteng sa CSur

Sinakyada kan mga kakapulisan kan Municipal Police Station sa Pili, Camarines Sur an tataghan kan mga envuelto sa ilegal na sugal na jueteng sa barangay San Roque kan Septiembre 14 aga alagad ‘‘bookies’’ an apod kan sugal habong kumfirmaron na operasyon sa ilegal na jueteng.

Alagad an Philippine Charity Sweeptakes Office (PCSO) sa Camarines Sur nagtutubod na envuelto sa ilegal na sugal na jueteng an nagkadarakop kan miembros kan awtoridad kan MPS asin an ilegal na actividad na ini apektado na an koleksyon kan Small Town Lottery (STL) na igwang permit sa gobierno.

Si Police Lt. Exequiel Bielma, opisyal na parataram kan MPS kan Pili, CamSur nagpahayag sa media na ‘‘bookies sa illegal number games’’, dai makataram na an siyam na nagkadarakop mga kabo asin kolektor sa sugal sa operasyon kan jueteng sa Camarines Sur.

Saiyang sinabi na an operasyon kan mga awtoridad ginibo mga alas 10:00 nin aga, Septiembre 14 asin siyam an mga nagkadarakop an duwa sa sainda taga Irosin, Sorsogon asin an saro taga Camalig, Albay mantang nakumfiscar an mga paraphernalia sa ‘‘bookies’’ asin taya na nagcacantidad nin Php4,020.

Sinabi kan opisyal kan PNP na ‘‘bookies’’ an sugal alagad dai nakakataram sa ilegal na sugal jueteng mantang saiyang pinapahimotikan na may operasyon kan jueteng sa Camarines Sur.

Si Jobet Ramos, branch manager kan PCSO sa Camarines Sur nagtutubod na igwa nang operasyon kan sugal na jueteng sa Camarines Sur mantang an mga nadakop sa San Roque, Pili, CamSur envuelto sa sinambit na sugal.

Saiya pang pigbuyagyag na nagrereclamo na an Even Chance Gaming Corporation, operator kan STL sa CamSur na nagpaparababa an saindang ingreso nin huli ta apektado na sinda kan operasyon sa jueteng digdi sa provincia.

Alagad si Ramos nagsabi padagos an jueteng operation sa Camarines Sur mantang an mga awtoridad nadidificilan na mag-midbid kan mga kolektor na naggagamit kan STL ngani sanang matakopan an ilegal na actividad.

Apektado pa an operasyon kan lotto sa provincia huli ta nalugi nin 30 por ciento kan saindang annual income kan 2020.

Sa STL nakaka-remit na sana nin 22 milyon pesos sa gobierno nasyonal mantang nagrereclamo sa hababang koleksyon huli kan operasyon kan jueteng. (DPA)