Bordado biktima naman ‘fake news’

Nag-anuncio pa sana an PAGASA sa kumfirmasyon sa bagyong Paeng, an opisina ni Congresista Gabriel H. Bordado Jr. kan tercer distrito kan Camarines Sur tolos naghiro nganing magcoordinar sa mga MDRRMO sa mga lokal na gobierno bilang pag-andam kun maglamasa an bagyong Paeng preparado na an saiyang mga staff sa District Office nganing madaling magdistribuer asin magtabang sa biktima kan kalamidad.


Pinahiro ni Bordado an saiyang personajes sa pag-monitor sa mga lugar na puedeng maapektaran lalo na si mga binabaha nganing madarahan tolos nin tabang o suporta.


Ini an piglinaw ni dating alcalde Abang Mabolo kan San Fernando, Camarines Sur asin Chief of Staff kan congresista sa tahaw kan nagluwas naman ‘‘fake news’’ sa social media na dai lamang nagpadara nin ayuda an congresista sa mga residentes na apektado kan nakaaging bagyo.


Nginisihan sana ni Mabolo an ‘‘fake news’’ mantang aram kan mga apektado kan nakaaging kalamidad na sinda nakarecibe nin ‘‘relief goods’’ na hakot-hakot kan personajes kan District Office na pinamamayohan ni Glenda Gados, kaibanan an aki kan lehislador na si George Bordado asin mga pag-iriba.

Mga personajes kan Disttrict Office ni Congresista Gabby Bordado tolos nagresponde matapos kan bagyong Paeng nganing magdistribuer nin ‘’relief goods’’ sa mga apektado kan nakaaging kalamidad. (Glenda Dasco)


Sinabi man ni Gados nalibot ninda an gabos na mga banwaan sa distrito na sinda nagdara nin mga relief goods sa mga residente kan barangay na na-apektaran kan kalamidad.


Magigirumduman dai inontokan nin mga ‘‘fake news’’ kan mga kalaban sa politica si Bordado alagad dai pinatulan kan mga taga tercer distrito kan CamSur mala ngani an resulta sa eleksyon kan Mayo 2022 naging landslide an saiyang kapangganahan.


An bagyong Paeng naglamasa nin makusog na uran asin duros na nagdulot nin tubig baha sa nagkaperang mga barangay alagad huli kan mga ginibong pag-andam kan LGUs sa paagi kan saindang personajes kan MDRRMO siring kan iba pang mga ahencia asin grupo na saindang nakatuwang nganing makaresponde tolos nin mga ayuda sa na-apektaran kan bagyo.


Dinagdag pa kan chief of staff na maheheling sa mga retrato an mga personajes kan saindang District Office na nagdidistribuer nin ‘‘relief goods’’