Bordado, deputy minority leader sa 19th congress

Magpapadagos na nasa minoriya grupo sa Camara-Baja si Representante Gabriel H. Bordado Jr. kan tercer distrito kan Camarines Sur sa masunod na 19th Congress alagad pugol niya man giraray an posisyon komo Deputy MInority Leader.


Ini an puedeng mangyari dawa na ngani mayo pa sindang pinal na urulay alagad kun igwa nang segurado iyo an mayo nang kalaban si Leyte 1st District Representative Martin Romualdez bilang masunod na house speaker.


Sinabi ni Bordado na igwa sana sindang 25 miembros kan minoriya mantang mayo siyang plano mag-iba sa mayoriya nganing ipadagos niya an pagiging ‘‘fiscalizer’’.


Kaipuhan an oposisyon sa masunod na administrasyon nganing enterong maserne an ano man na aaprubaran na house bill sa masunod na congreso.


‘‘Kaipuhan an fiscalizer sa democraciang nasyon nganing maserne kun igwang nangyayaring cuestionable ipapasar na bill asin ano man na prosupuesto kan administrasyon.’’


An representante kan tercer distrito miembro kan Liberal Party (LP), kaalyado kan paluwason na Bise Presidente Leni Robredo na dinaog sa eleksyon ni President elect Ferdinand Marcos Jr.


Dawa yaon siya sa oposisyon, sinabi pa ni Bordado na ipapadagos niya an mga proyekto sa saiyang sakop na distrito.


Sa naghihinanapos na 18th Congress maabot sa 75 house bill na saiyang pigpadrenohan mantang an iba co-author asin nakapasar dawa yaon siya sa oposisyon.


Sa nagtapos na congressional election, ‘‘landslide’’ an saiyang kapangganahan sa gabos na mga banwaan asin Ciudad nin Naga kan 3rd congressional district kan provincia. (dpa)


MITING SA NCPO. Kaulay ni Representante Gabriel H. Bordado Jr. kan tercer distrito kan CamSur an mga halangkaw na opisyales kan Naga City Police Office sa pamamayo ni CD Col. Nelson Pacalso, Lt. Col. Errol Garchitorena Jr., asin Lt. Col. Josel Zape mantang pighanda sa pamahawan na miting iyo an puto, ibus, latik asin kape. An NCPO igwa nang labing 800 na kapupulisan nganing magmantenir kan paz y orden. (Mic Martinez)