Bordado masangat bill vs Rice Tariffication Law

Masangat nin bill sa 19th Congress si Congresista Gabby Bordado kan tercer distrito kan Camarines Sur nganing dagos nang ibasura an Acta Republica 11203 na mas midmid sa controvercial na Rice Tariffication Law (RTL).

Alagad ngunian na 18th Congress saiya munang pig-aadalan an ‘‘pros and con’’ mantang imposibleng marealisar na ma-enmiendahan o ma-repeal an RA 11203 huli ta si Presidente Rodrigo Duterte an nasa likod kaini nganing maipasar an ley sa congreso, sabi pa ni Bordado.


Si Senador Cynthia Villar, chairman kan Committee on Agriculture iyo an nagpadreno kan senate bill sagcod na aprubaran asin pinirmahan ni Duterte.


Nakaabot na sa District Office kan congresista an mga reclamo kan mga paraoma huli ta matolong taon na an RTL alagad pagabat sa pagbuhay kan paraoma mantang bagsak na an presyo kan paroy an nakikinabang iyo an rice traders ta sinda nag-aangkat kan bagas iyo pa an nagdidikta kan presyo sa mercado.


Sa entrevista kan Bicol Mail ki Silvestre Bonto, presidente nasyonal kan Confederation of Communal and National Irrigators Association of the Philippines, sinabi kaini patolong taon na apektado an sektor nin paraoma sa hababang presyo kan paroy na nag-aabot na sana sa P11.00 hasta P12.00 cada kilo hale sa dating P16.00 sagcod sa P17.00 cada kilo kan panahon na dai pa kan Rice Tariffication Law.


Sa saindang computation nalulugi sinda nin P4.00 hasta P5.00 cada kilo.


Pig-oorgulyo kan gobierno an libreng patubig kan National Irrigation Administration na dos por ciento sana an saindang binabayad sa irrigation fee mas marhay pang ibalik an irrigation fee asin ibasura an RTL, segun pa sa lider nin paraoma.


An dahilan kan gobierno sa RTL bilyones peso an saindang nakokolekta sa buwis sa tariff hale sa mga rice traders asin an makikinabang an sektor nin paraoma enforma nin makinarya sa pag-oma.


Alagad sinabi ni Bonto na pera sana man an nakikinabang kan pigsasabing tabang sa mga paraoma, lugi man giraray sinda.


An RTL pinirmahan ni Duterte kan Febrero 14, 2019 sa tahaw kan mga ginigibong protesta sa Malacañang kan mga paraoma na suportado kan National Food Authority na dapat ibasura an ley alagad dai sinda dinangog. (dpa)