BORDADO NAG ATUBANG SA OPISYALES KAN CASURECO II: Diyalogo sa halangkaw na tarifa
Sa tahaw kan reclamo kan miembros-consumedores kan Camarines Sur II Electric Cooperative (Casureco II) maging iba pang cooperativa nin electricidad, si Camarines Sur 3rd District Congressman Gabby Bordado nagpaapod nin diyalogo sa opisyales kan cooperativa bako na maki-debate sa nagparalangkaw na tarifa envez maaraman an dahilan nganing an isyu ipaabot niya sa congreso.
An diyalogo ginibo kan Sabado, Septiembre 10 sa Villa Caceres Hotel na presente an miembros kan media asin mga staff kan lehislador.
Sinabi ni Bordado na pendiente pa an approval kan budget kan Energy Regulatory Commission na pigcucuestion sa congreso kun ta’no ta mayong nagiginibong aksyon an ahencia sa nagpaparalangkaw na tarifa kan mayoria kan 120 mga coopertiva nin electricidad sa nasyon.
DIYALOGO. CamSur 3rd District Congressman Gabby Bordado Jr. (nasa too nakatindog) kaatubang an mga opisyales kan Casureco II sa isyu kan nagpaparlangkaw na tarifa sa kuryente. (Mike Martinez)
An ano man na dahilan asin mayor na isyu iyo an saiyang ipapaabot sa budget hearing sa ERC, sabi pa ni Bordado.
Si General Manager Emelita Candia, Board President Gay Pabines mantang presente an miembros kan junta directiva asin mga technical staff kan Casureco II nagpaliwanag kan mayor na isyu sa halangkawon nang tarifa hale sa dating P8.00 cada kilowatt hour alagad sa ngonian nag-aabot na sa P18.00.
An isyu sa pass on charges kan saindang mga power suppliers iyo an dahilan lalo na an generation charge na nagcacantidad na nin P11.7580/kWH, transmission charge, P0.5712/kWH, government charges P2.1152/kWH asin iba pang sinisingil na buwis kan govierno maging an LGUs asin system loss na nagcacantidad nin P1.5163/kWH.
An paglangkaw kan babayadan sa kuryente huli kan pagparalangkaw kan Generation Charge na ‘‘Pass on Charge’’ na ibinabayad man sana sa mga power suppliers kan Casureco II, alagad mayong naglalaog na ingreso sa cooperativa hale sa paglangkaw kan tarifa nin kuryente.
Sinabi pa kan Casureco II sa halangkawon na tarifa alagad an naglalaog sanang cuarta sa cooperativa nagaabot sana sa P1.5372 cada kWH poon pa kan iimplementar kan ERC an RSEC-WR. Doseng taon nang dai sinda nagpapalangkaw nin singil sa tarifa.
An mayor pang dahilan na paglangkaw kan tarifa iyo man an nagparalangkaw na presyo inaangkat na uring sa ibang nasyon kan mga power supplier na saro sa causa iyo an nangyayaring giyera sa Ukraine asin Russia.
An congresista nagpahayag pa na pakatapos kan budget hearing sa ERC liwat siyang mapaapod nin diyalogo. (dpa)