Bordado nakaandam mag-file nin bill na mamukna kan MNDA

Magkakaigwa nang realisasyon an plano kan nakaaging eleksyon ni Camarines Sur 3rd District Representative Gabriel H. Bordado Jr. na magplantiar nin house bill na nagmumukna kan Metro Naga Development Authority (MNDA) na igwang miembro maabot sa veinte LGUs hale sa presenteng Metro Naga Development Council (MNDC).

Pinahayag ni Bordado sa programang ‘‘May Boses Kita’’ sa RMN-DWNX sa paagi kan program host dating Alcalde Abang Mabolo, nakaandam na siyang mag-file nin bill sa Camara-Baja ngonian na second regular session kan 19th Congress mantang katuwang niya sa senado iyo si Senador Aquilino ‘‘Koko’’ Pimentel.

Haloy na sinda nagkaulay kan senador nganing mas mapusog an mga plano, mauswag an economia asin programa bako lang sa social services maging sa surompay na proyekto asin magkaigwa nin permanenteng fondo hale sa caja nasyonal nganing magamit sa ano man na proyekto, sabi pa ni Bordado.

Saiyang napag-araman na an presenteng MNDC sa pamamayo ni Alcalde Nelson Legacion igwa man plano an grupo na saiyang hinahalat nganing pagsaroon an propuestong house bill.

Magigirumduman an MNDC sa panahon ni dipuntong Alcalde Jess M. Robrero nacrear sa paagi nin Executive Order 102 ni dipuntong Presidente Fidel Ramos na pig-isyu kan Hunyo 18, 1993.

An orihinal na miembrong LGUs hale sa mga banwaan kan dating segundo distrito na ngunian tercer distrito, kinababalihan kan Ciudad nin Naga, Pili, Ocampo, Calabanga, Canaman, Milaor, Magarao, Camaligan, Bombon, asin Gainza alagad nakadagdag an mga LGUs kan San Fernando, Pasacao, Pamplona, Libmanan, Siruma, Bula, Minalabac, asin San Pascual, Masbate.

Digdi sa Camarines Sur igwa nang Partido Development Authority (PDA) na namukna sa panahon ni dipuntong House Speaker Arnulfo Fuentebella kan cuarto distrito kan provincia.

Sa paagi kan PDA nagkaigwa nin sadiring Partido Water District sa mga banwaan sa sakop kan distrito, nagkaigwa nin sadiring opisina asin nakahaman nin iba pang mga proyekto. (DPA)