Bordado suportado ni VP Leni

Si incumbent Congressman Gabriel Bordado Jr. iyo man giraray an opisyal na candidato ni Bise Presidente Leni Robredo bilang representante sa tercer distrito kan Camarines Sur sa maabot na national asin local election sa Mayo 2022.

Si Bise Presidente Leni Robredo (sa wala) nagcierto na padagos niyang susuportaran sa maabot na eleksyon sa 2022 si Congresista Gabby Bordado (sa too) kan tercer distrito kan CSur. (Mic Martinez)

An kumfirmasyon ni Robredo ginibo sa halipot na oras na press conference kan Sabado, Febrero 20 sa JMR Museo kan Ciudad nin Naga kasunod man kan pagbutwa kan sarong abogado na dating ka-klase si dipuntong Alcalde asin DILG Secretary Jesse M. Robredo na nagpapabisto na sa mga banwaan sa tercer distrito kan saiyang ambisyon sa politica.

Sinabi pa kan bise presidente si Bordado iyo an nagpadagos kan saiyang pigsangat na mga house bill sa Camara-Baja kan siya representante pa sa tercer distrito kan Camarines Sur sagcod na naging ley na ngunian.

Naka-duwa nang termino si Bordado, marhay an pagrepresentar satuya sa congreso asin kinaka-urgullo marhay an trabajo pag-abot sa ‘‘legislation’’, sabi pa ni VP Robredo.

Saiyang pig-osipon na napapangisi siya kun hinahapot isay an candidato niya sa tercer distrito alagad an sabi niya mayo man siyang ibang candidato si Congresista Gabby Bordado.

Dinagdag pa kaini, kun igwang magpa-aram na maghahagad nin suporta niya sa pagcandidato sa tercer distrito ‘‘Mayo akong ibang candidato si Congresista Bordado, opisyal na yan’’

Si Bordado asin dipuntong alcalde Robredo decada nang nag-iribanan puon sa dating Bicol River Basin Development Program sagcod na naging alcalde kan Ciudad nin Naga sa laog nin 18 anyos asin ngunian nagpapadagos an pagdamayan ninda sa politica kan bise presidente.

Dinagdag pa kan bise presidente na sa Ciudad nin Naga an Team Naga na pinamamayohan ni Alcalde Nelson Legacion iyo man giraray an saiyang suportado. (dpa)