Border control panlaban vs pagtransportar droga

Pilay an darakulang mga transaksyon sa ilegal na droga sa Camarines Sur mantang apektado an pagpapulsit sa viaje sa mga border control na pigtugdas kan LGU sa tahaw kan halangkaw na caso kan Covid-19.


Bako lang sa linderos hale sa provincia nin Quezon maging an border control sa Albay asin pagpalusot sa viaje sa kadagatan hale sa southern Visayas maging sa Mindanao yaon digdi an mga puerto na guwardiado kan mga awtoridad.


Kun igwa man nadadakop sa ngunian halangkaw na an cantidad Php150 mil hasta Php300 mil kan cantidad kan droga na nadadakop sa mga operasyon kan Philippine Drug Enforcement Agency (PDEA) asin PNP.


Ini an mga pahayag sa Bicol Mail ni Lt. Col Louie Dela Peña, opisyal na parataram kan PNP Provincial Office sa Camarines Sur sa tahaw kan mga nadadakop sa ngunian na mga small timer na nagtutulak nin droga.


Bako lang personajes kan Capitolio Provincial kan Camarines Sur an nasa Del Gallego Border envez mga kapupulisan asin igwa pang reinforcement kan Philippine Army na nag-iinspeksyon kan laog kan vehiculos asin mga pasajeros.


Dawa na ngani an saindang trabajo iyo an implementasyon kan health and safety protocols alagad alangan man giraray an mapalusot nin droga huli ta guwardiado an border control.

Mga vehiculo hale sa National Capital Region palaog sa border control kan Del Gallego, Camarines Sur nakapirila sa gilid kan tinampo nganing ma-inspeksyon an saindang dokumentos na pigmamando kan IATF asin pigheheling an pasajeros asin mga bagaje. (CSur.gov.ph)


Alagad piglinaw kan PNP Camarines Sur na dai paman totalmenteng napupuho an ilegal na droga envez nagluya an saindang transaksyon.


Apektado man kan pandemya asin mga border control alagad an PNP asin PDEA padagos kan saindang biglaan na drug operations, sabi pa ni Dela Peña.


Sa Ciudad nin Naga, an Sagrada Familia sa barangay Peñafrancia na decada nang tataghan nin dorogista alagad sinabi ni Punong Brgy. Ricardo ‘‘Boboy’’ Siera Jr. na bilang na na sana sa muro na gramos an nakukumfiscar sa mga drug operation kan PDEA asin PNP.


Sinabi pa ni Dela Peña, afuera kan epekto kan Covid-19 yaon pa an pig-iimplementar na curfew ordinance kan mga lokal na gobierno.


Sa ngunian an mga unaffected barangay kan ilegal na droga sa provincia igwang 130 mantang maabot na sa 400 drug cleared asin igwa nang kaenterohan na 530 sa total na 1,036 na mga barangay sa Camarines Sur. (dpa)