BOSS Piglatag kan mga LGUs
Padagos na ginigibo an mga transaction sa Business One Stop Shop (BOSS) na piglatag kan mga oficina kan gobyerno kairiba an local government unit (LGU) sa bilog na nacion sa laog kan bulan na Enero ngonian na taon.
An BOSS pigbukasan kan mga oficina kan gobyerno katakod sa provisiones kan RA No. 11032 tanganing maging marikas, conveniente asin eficiente an pagproceso kan mga papeles asin requisitos para sa renewal o bagong business application.
An ley nagbubusol kan magean na pagnenegocio asin eficienteng pagduhol kan servicio kan gobyerno asin nag-amendar kan RA No. 94865 o Anti-Red Tape.
Mayormenteng nagpapadalagan kan BOSS sa mga LGU iyo an Business Permit and Licensing Office (BPLO), katabang an mga oficina kan gobyerno na nagpoproceso kan mga requisitos tanganing maging legitimo an sarong negocio. Sa paagi kaini, minalaog an tamang ingreso nin buwis sa kaban kan gobyerno.
Si Orlando F. Pan, Licensing Officer III kan BPLO kan LGU Goa, Camarines Sur, nagpahayag na an BOSS nagbukas magpoon Enero 2 kairiba na an aldaw na Sabado, asin pigtalaan an pagtapos alas diez nin banggi kan Enero 20.
Mientrastanto, sa man-iba-ibang localidad sa bilog na nacion igua man nin sadiring schedule na pigpautob asin may designadong lugar na yaon mismo sa municipal/city hall o haraning edificio digdi.
Segun ki Pan, an mga oficina arog kan Bureau of Fire Protection, Rural Health Unit asin Department of Trade and Industry pigsararo sa lobby kan Goa Municipal Hall para sa conveniencia kan mga negociantes.Igua man lamesa para sa notario publico na nag-aatendir sa pangangaipo kan mga cliente.
An mga oficina kan Municipal Assessor asin Engineer yaon sa kaparehong edificio kaya facil dulokon kan mga cliente. Siring man, an Treasurer’s Office harani sa puwesto kan BOSS kaya madali an pagbayad kan pigtasar na fees asin dues.
Pigtawan doon kan Licensing Officer III na mas ventaje para sa mga negociante an magcomple kan requisitos asin babayadan sa tamang periodo mantang iguang discuentong pigtatao sa sainda. An mga nagpalya na magbayad sa designadong panahon an pinapatawan man nin penalidad.
Nanotaran ni Pan na an naglangkaw na numero kan negocio sa Goa iyo an grocery asin mga eatery o kakanan. An Goa midbid na centro kan comercio sa Partido area asin iguang sustenidong revenue generation policy. Sa presente, saro ini sa limang LGU sa Partido area na clasificado bilang 1st class municipality.
Segun sa Licensing Officer III, tanganing malampasan an collection target kan LGU, sarong activo asin pusog na tax campaign an gigibohon sa mga masunod na bulan kabali an personahes kan BPLO, Municipal Treasury asin pag-iribang oficina.
An tax campaign mas papahiwason kairiba na an mga hararayong barangay para sa dagdag ingreso sa kaban kan local na gobyerno. Ini maresulta sa mas mahiwas na serbisyo, programa asin proyekto para sa karahayan kan mga namamanwaan.
Comments