BOSS piglatag sa LGUs, GOCCS, ibang agencias kan gobyerno

Ni Sonny Malate

LAGONOY, Camarines Sur --- Piglatag an Business One Stop Shop (BOSS) sa banwaan na ini, kasarabay na sa bilog na nacion ngonian na primerong bulan kan taon 2026..

Ini katakod sa pagcomple sa RA 11032, o an Ease of Doing Business Act. An ley nagmamando sa mga local government units (LGUs), Government - Owned and Control Corporations (GOCCs) asin iba pang agencias de gobyerno na maglatag nin  BOSS para sa magean na transaction sa gobyerno.

Objeto kan ley iyo an maparikas an transaction, mapakarhay an servicio publico asin maiduhol sa namamanwaan an magean, conveniente asin standard na sistema nin transaction katakod sa negocio asin iba pang servicio.

Siring man,  an paglatag asin monitor kan Anti-Red Tape Authority (ARTA) asin pag-implementar kan mga reformang pighuhurot kaini,  kairiba na an pagdesignar nin timeline asin penalidad sa mga dae macomple digdi. 

Segun ki Jonathan F. Bacares,   Business Permit and Licensing Officer designate, sa paagi kan BOSS na pig-initiar kan LGU sa liderato ni Alkalde Dyego Luiz H. Pilapil, an pagiging business-friendly kan LGU an nasususteniran, dalan tanganing maibusol an kauswagan kan banwaan. 

Dagdag ni Bacares, an huben na alcalde naghuhurot kan sarong magean, conveniente asin marikas na sistema sa mga negociante dapit sa business permit registration renewal o bagong negocio ninda,  mantang sinda katuwang kan LGU sa kauswagan.

Kabale digdi iyo an integration kan  barangay clearance sa mga transaction sa BOSS na dakulang kageanan sa mga negociante asin Barangay Council mismo. 

Katuwang kan BPLO sa BOSS iyo an Office of the Mayor, Sangguniang Bayan sa pamamayo ni Bise Alkalde Jerry Jake R. Remoto,  MPDC, Engineering Office, RHU asin  Treasurer's Office. Siring man, an BFP, DTI asin PhilHealth.

Sa paagi kan mga personahes kaini, nagiging madali an pagproceso kan documentos, pagtasar asin pagbayad kan mga maninigong permit, buwis asin  regulatory fees sa lado kan mga negociante. 

Susog ki Bacares, kan nakaaging taon, an Lagonoy iguang labing Kinyentos (500) na darakula, asin lampas dos mil (2,000) na saradit na negocio. Siya naglalaom na sa paagi kan BOSS maaabot ninda an target revenue para sa 2026.

Nanotaran kan BPLO designate na padagos na nagbabaskog an comercio sa banwa. Pruweba kaini iyo an pagdagdag kan mga grocery store, pagbukas kan sanga nin convenience asin drugstore asin bangko digdi. 

Sa presente, an LGU may pigpapaconstruir na bagong mercado publico. Ini pighihiling na dagdag contribuente sa pagrambong kan local na economia digdi asin macomplemento sa esfuerzos kan LGU na masusteniran an first class income classifcation kaini.

Mientrastanto, pigbuyayagyag ni Bacares na apwera kan BOSS kada Enero, an LGU nagcoconducir man nin "door to door" BOSS sa mga barangay sa bulan na Mayo hasta Hulyo para matutukan an mga may negocio sa barangay dapit sa regulatory fees ninda. 

Dawa na arog kaini, nangapodan siya sa mga negociante na aprobecharan an servicio sa BOSS hasta Enero 31 para sa kahinggeanan ninda asin tanganing malikayan an surcharge asin  penalidad sa late payment.

Business One Stop Shop sa Lagonoy, Camarines Sur. (Photo - Bicol Mail)