Boy Lado

Naglalagatob sa Youtube an pangaran na Boss Kareppa aka “Boy Lado”.

Bantog-bareta bako lang sa Bicol kundi sa ibang parte kan nasyon pati sa abroad an famusong taga Ragay na si Jerome Martinez Davis, 30 anyos na pigkakasiributan kan mga paradalan sa social media dahil kan saiyang mga pasali na nakakapangisi asin nakakataong kaogmahan sa mga paradalan.

Aki nin sarong Amerikanong itom asin Filipinang ina na taga Ragay. Siya nagdakula asin nag-eskwela sa nasambit na banwaan kaya an saiyang taramon na Bicol, Bicol na Bicol.

Pabarubalyo siya nin eskwelahan maski sa Ragay poon Agro Passion, Apad asin Ragay Central. Makibarkadahon asin nag-aagui man ngani daa sa kudal nganing magdulag sa eskwelahan.

Nalibot niya an provincia poon Naga, Pili asin Partido area.

Nakaabot man siya duman sa nasyon kan saiyang ama sa America kun sain siya nagtrabaho. Alagad nag-uli sa Pinas kun sain niya nakua an swerte sa ngaran nin social media.

Ambition niya kuta na maguin soldados arog kan saiyang ama o maguin basketball player sa PBA ta an saiyang langkaw 6’ “2” pero nadakop siya sa paguiguin “Blogger” sa social media. Enot dikit lang an saiyang follower alagad pakalihis nin poco mas ominos 2ng taon nagparadakul an saiyang tagahanga sa Naga, sa Legazpi, sa Manila asin abroad.

Aktor, director, producer pa kan saiyang show o blog. An mga gamit niya poon camera, ilaw pati gubing kadaklan hali pang America.

Pambihira an saiyang talento ta kaya niyang magpapel kan saiyang sadiri, magpapel nin ibang tao asin kadakul pang iba nasarabay-sabay pero an hitsura siya man sana.

An mga estorya kan saiyang blog dapit sa irinoman, dapit sa paguiguin daog-daog kan agom, dapit sa Christmas exchange gifts, haradukan sa irinuman, biyaheng pasiring langit asin imperyo, Satanas asin San Pedro, dapit sa rolookan sa eskwela, ararogan o koropyahan, pa cute sa paratukdo asin pati barkadahan, etc..

An saiyang komedya sa Bicol may subtitle na Tagalog asin English na naiintindihan kan gabos. Sabay ngirisi.

Si Lado Bicol na Bicol talaga mala ta kun nagtataram siya perming may halong Buray, Bugay ni Ina niya garo ordinaryong juvenes ngonyan lalake o babae na tood nang magsambit kan saindang dara-dara asin tago-tago.

Garo nagmamasid siya kan mga pangyayari sa palibot, nagdadangog kan iristoryahan o orolay-olay asin paborito niya an tataramon na Bicolnon maski siya mestizong Amerikano.

Sa Ragay kun iisipon kabanga kan populasyon Tagalog o Batangueήo pero kadakul pang puro Bicolano arog kan mga Andaya, Aquino, Avila, Casiano, Vela, Seήar maski si Congressman Horibata na mestizong Hapon.

Kadto an Libmanan an pigsasabi na puedesir maguin sarong ciudad ta kadara-dakula an populasyon pero ngonyan an Ragay na pigbabagtas kan Quirino/ Andaya Highway mas naguiguin sikat na marhay bako lang ta may bagong liderato/dinastiya kundi dahil ki Boy Lado. Aram kaya kan gabos na siya taga Ragay.

Orgolyoso pati siya.

An mga blogs ni Lado bakong maka-uyam maski oro-otrohon mo pa.

Marhay pa siyang endorser asin online seller.

Marhay pati siyang mag-ataman nin tagahanga orog na an mga may kamatean ta dinadalaw niya personalmente maski sa hararayong lugar asin pigdadarahan pasalubong, kuarta asin pagkakan.

Pamilyado, may agom asin may aki garo dai na siya mabuelta sa America o ma-estar duman ta marhay na an kamugtakan niya digdi. Panu-pano na an bulsa.

Enjoy siya kan saiyang popularidad asin pagpadangat kan saiyang kapwa Bicolano asin kapwa Pilipino.

Sa Naga an apod sa “lado” loko, loko-loko, bua, raot, kapay pero sa Libmanan an apod kaiyan lado. Pero an pinaka-eksaktong apod sa Tagalog iyo an kalog kaya lang suminikat an terminong lado dahil ki Boy Lado.

Sa English an terminong “Lad” boot sabihon boy kaya Boy Lado he he he…

Estorya kan saiyang dating paratukdo sa elementarya si Boy Lado talaga pasaway mala ta nakalibot siya sa manlaen-laen na eskwelahan . Alagad kan naka-aguing pandemya`nagbalik siya sa mga dati niyang eskwelahan asin nagdonar nin mga coupon bonds susog kan mga kahagaran kan saiyang mga dating titser.

An terminong Lado sa Bicol bako lang gamit sa Libmanan dapit sa mga pilyong namamanwaan kundi iyo an dapit sa klase nin niyog na bako man tipong, bako man lukadon, bako man kudkuron, bako man kuprason ta daing data an parong na dapat daa iapon.

Pero si Boy Lado nagtaong onra sa Bicol para sa kaogmahan kan mga namamanwaan.

Segun saiya siya sarong komedyante na may mensahe para sa gabos asin mag-pangisi sa kadaklan.

Mabuhay ka Boy Lado. Thank you Padi.