Brig. Gen. Bustamante pinakahalipot na RD sa Bicol

Si Brig. Gen. Bartolome Bustamante, napadali na maribayan bilang regional director kan Philippine National Police (PNP) sa Bicol na nag-pitong bulan asin duwang semana kan ribayan ni Brig. Gen. Jonel Estomo sa ginibong simpleng turn-over ceremony sa Camp Semion Ola, Ciudad nin Legazpi kan Abril 26.

Si mga nakaaging regional director naglalawig sa duwang taon na maximum asin igwa man nagdurar sana nin sarong taon mantang si Bustamante inabot nin pitong bulan alagad an Camp Crame mayo man tinaong dahilan.

Piglinaw ni P/Major Malou Calubaquib, opisyal na parapahayag kan Bicol PNP na normal sa saindang organisasyon na ano man na oras puedeng ma-relieved sa posisyon asin idestino sa ibang lugar.

Mayong naheheling na causa o dahilan nganing ma-relieved nin amay si Bustamante asin an saiyang bagong posisyon sa Camp Crame bilang Chief of the Directorate for Human Resource Doctrine, sarong promosyon, sabi pa kan Camp Semion Ola.

Sa ginibong turn-over ceremony nagpahayag nin dakulang pasasalamat si Estomo ki PNP Chief Director General Devold Sinas nganing matawan nin mas halangkaw na posisyon.

Sinda Bustamante asin Estomo kabale sa sampolong mga opisyal na inukag ni Sinas.

An seremonya naging simple sana asin limitado an inbitadong mga visita huli kan coronavirus disease.

An bagong RD kan Camp Semion Ola nag-graduar sa Philippine Military Academy Class 1992, dating nadestino bilang director kan Anti-kidnapping Group (AKG). Kabale sa saiyang acomplisimiento iyo an pagkaka-resolver kan mga caso sa kidnapping asin pagkaka-arestar sa 146 na mga suspechado puon kan 2020 hasta sa saiyang ultimong aldaw antes nadestino sa Bicol, dating provincial director kan provincia nin Camarines Norte asin limang taon sa CIDG National Headquarter.

Sa isyu sa pagbabalasa nin mga provincial director an bagong liderato kan Bicol PNP nagpahayag na magdedefende sa performance kun sinda dapat ibalyong posisyon. (DPAureus)