top of page

BSK Eleksyon: Madali na, Harani na



An pagtubod kan kadaklan an siisay man na makakapagana nin dakul na kapitanes, barangay kagawad asin SK opisyal iyo an maganang mayor, gobernador, congressman, senador asin president kan Pilipinas etcetera.


Kaya maski halipot sana an an pigtugutan na campaign period pero segurado na maski mayo nin vote buying o barakalan nin boto igwa na nin advance an apod kaiyan ayuda.


Ining mga aro-ayuda kan gobyerno nasyonal, DSWD, LFTRB, DOTR asin LGU asin iba pa maski ano pang sabihon advanced vote buying na yan. Kaya dae nindo namalisyahan na maski sa payout nin pensions sa mga senior citizens kadakul opisyales kan gobyerno an nagpoporma asin nagpapa-picture.


An magaranang opisyales kan barangay iyo na an maguiguin parakampanya sa masunod na eleksyon lokal maguin sa banwaan, provincia asin nasyon asin nasyonal 2028.


Dati an eleksyon sa barangay mayo daang politika kaidto pero ngonyan igwa na hayag-hayagan pa.


Mayo daang dinastiya an politika sa barangay saka mga juvenes pero pag-abot sa provincial asin distrito dae pwede daang ibitaran ta mantang dae pigtutugot kan Constitution pero ibinuboroto man daa kan mga tao.


Kun ako an hahapoton mas marhay na mayo lugod nin sweldo an mga opisyales kan barangay arog kan mga panahon. An kuarta, an sweldo asin iba pang benepisyo kan mga opisyales kan barangay iyo lugod an nakakaraot kan kamada.


Nakakanurood magkurakot.


Idto nganing sakong lolo na saro sanang delegado an apod kan kapitan kan tiempo Hapon pigsugal an saiyang buhay para sa mga tao, mayong sweldo pero sabi kan sakuyang lola an gabos na magsakat sa harong maguin suldados, gerilya o mga Hapon pinapadagos sa harong asin pinapakakan pa asin pinapaturog.


Nagpadrino lang nin sarong karasalan sa simbahan pakatapos kan misa pigkua na kan mga Hapon asin pigdara na sa Cadlan kun saen duman na siya binadul-badulan asin binitay sagkod na magadan. Nakua an saiyang restos pakatapos na kan giyera. An biyuda na sakuyang lola anom na bulan na nagpaparahanap-hanap kan saiyang agom na sarong opisyal kan barangay alagad dae nakua. Kan matagbuan an bangkay nakalubong na diyan sa Boys Scout camping site sa barangay Cadlan kan Pili asin nabisto na lang an saiyang gubing na americana.


Sagkod ngonyan 80 anyos pakatapos kan pangyayari dae man lang siya nabayaran maski kan gobyerno kan Hapon.


An sakuyang amiga na kandidata para kagawad kan maka-ulay ko kan sarong aldaw nagreklamo ano kaya daa ta nakikiaram an mga politikos sa barangay sa eleksyon sa barangay asin Sangguniang Kabataan sa Oktubre 30.


Sabi niya kun maserve-magserve lang maski mayo nin kabayaran.


Pero ta iyo na yan an kalakaran o sistema ngonyan talagang may sweldo na an mga barangay asin SK officials. May mga allowances, may mga pabalon pa kun nag-aaratendir nin seminar sa Naga, sa Legazpi, sa Manila asin iba pang lugar kun saen sinda ipinapadara.


Sa masunod na eleksyon ngonyan na bulan na Oktubre aram ta na na an magarana kabig nin mga politiko.


Bako an kandidato an nagbabakal nin boto kundi mga darakulang politiko ta sinda an mabeneficio ngapit kan maguiguin resultado.


Masdi nindo an burulyada sa Kongreso ngonyan kan mga senadores, congressmen dapit sa maguiguin budyet kan gobyerno norong taon asin sa mga masurunod pa.


An suspetsa ko an makarandidato para presidente sa otro eleksyon nasyonal kun bakong an apelyedo Duterte, an pangaran Ferdinand (Mar…) o Rissa ng maka-wala.


Pustahan pa na.


Kulibat ko palan, bantayan ta an padagos na paglakop kan illegal na droga.

תגובות


bottom of page