BSKE 50-50, sabi kan Comelec

Daing kasegurohan kun madadagos an nakatalaan na Barangay asin Sangguniang Kabataan Elections (BSKE) sa Deciembre 1, 2025 alagad an Commission on Election (Comelec) padagos an saindang pag-andam mala ngani pigpoonan na ngunian na Agosto 1 hasta 10, 2025 an voters’ registration.

An dahilan iguang sarong bill sa senado na ma-uktaba kan pirilian hale sa Deciembre 2025 dapat gibohon sa Oktubre 2026, sabi ni Election Officer Atty. Maico Julia Jr. pamayo kan Comelec sa Ciudad nin Naga.

Sinabi pa iguang en banc resolution an saindang opisina sentral na ipadagos an voters’ registration madagos man o dai an BSKE nganing pirming nakaandam sinda.

Dawa igua sindang ginigibong preparasyon alagad mayo sindang magiginibo kun permahan ni Presidente Ferdinand Marcos Jr. an bill nganing maging ley.

An ibang opisyales de barangay nagsabi na pabor sinda i-uktaba an BSKE nganing matapos ninda an naka-programang proyekto sa barangay.

Alagad si ibang asperante nagsasabi na igua nang dating inaprubaran an Corte Suprema na prohibido na an pag-uktaba kan pirilian sa barangay.

Si dating Liga ng Barangay asin Consejal Vidal Castillo nagsabi na posibleng cuestionable an bill kun maaprubaran ni Marcos huli ta igua nang na-enot na desisyon an pinakalangkaw na corte sa nasyon na dapat dai na pagpara-uktaba an BSKE.

An propuestong bill sa senado pigtutulod na gibohon apat na taon an sarong termino kan opisyales de barangay alagad pwedeng mag-re election mantang sa SK sarong termino.