Budget sa MOOE kan BMC naglangkaw 236%

Hale sa dating P98.550 milyon na Maintenance and other Operating Expenses (MOOE) sa 2020 General Appropriation Act of 2020 kan Bicol Medical Center (BMC) alagad pinadakula ini kan congreso sa P232.795 milyon o naglangkaw nin 236.22 por ciento an MOOE para sa 2021 national budget.


An hospital igwang mga bagong darakulang edificio mantang nagpaparadakul an mga piglalaog na mga pasyente aroaldaw.


Alagad hinahalat kan BMC an dugang na budget para sa implementasyon kan Acta Republica 11478 o mas midbid sa Bicol Medical Center Modernization Law na pinangenotan ninda Congresista Gabby Bordado kan tercer distrito asin Congresista LRay Villafuerte kan segundo distrito parejo kan provincia nin Camarines Sur nganing makapasar an propuestong ley sagcod inaprobaran ni Presidente Rodrigo Duterte.


Sa sinambit na ley, magkakaigwa nin dugang na bed capacity an hospital hale sa 500 gigibohon nang 1,000 asin piglalaoman huli kan modernisasyon kaipuhan an dugang na mga doctor, nurses asin empleados asin dugang na mga ekipahes.


Si Dr. Francisco Sales III, Medical Director kan BMC matapos manombrahan bilang permanenteng jefe kan hospital nagpaapod na kan enot na miting kan opisyales kan hospital kabale an miembros kan Multi-Sector Governance Council (MSGC).


Nagkaigwa nin marhay na resulta an conferencia sa pagpakusog kan plano asin programa sa salud asin serbisyo kan hospital sa ginatos na pasyente na naglalaog sa hospital aroaldaw.


Sa listahan kan BMC an saindang pasyente hale sa dating 33,000 kan 2015 alagad an numerong ini naglangkaw sa 44,549 kan 2019. Sa bed occupancy kan hospital kan 2019 naglangkaw sa 194.82 por ciento, na dakulang angat sa manijamiento an pagparadakula kan capacidad nganing maserbehan an mga pasyente mantang an reclamo sa sainda iyo an kakulangan nin facilidad na dai kuntento an publiko.


An hospital dinadayo nin pasyente bako lang hale sa Camarines Sur envez sa iba pang mga provincia kan Bicol. (dpa)