top of page

Buhay Brodkaster



Ngonyan na may bago nang opisyales an Kapisanan ng mga Brodkaster sa Pilipinas (KBP) sa Camarines Sur sa taon 2024-2025 sa pangengenot ni chairman Ron Enon an SM Ok FM asin vice-chairman Bong Villacruz, SM kan Idol FM, panahon na seguro na ibuyagyag an mga bagay na dae aram kan publiko dapit sa kapisanan.


Poon 1976 kan magtao nin accreditation exam an KBP asin Broadcast Media Council sa Bikol, dae aram kan kadaklan na an KBP organisasyon sana kan mga station asin netwok owners bako man kan mga managers o kan mga brodkasters mismo. An mga managers representantes sana kan may mga saderi kaya dae man nakakapagboot.


An pinaka-pamayo kaidto sa enterong Pilipinas ta martial law kaidto iyo si Teodoro F. Valencia, an sikat na columnist sa Manila Times na pigtitiwalaan ni Presidente Ferdinand Marcos Sr.


An huna mi kaidto pagnakapasar ka sa KBP accreditation exams brodkaster ka na forever.


Idto palan bako man ta kun maghali ka sa sarong estasyon bilang announcer, DJ, o komentarista, kun dae ka makabayad kan annual dues goodbye ka na sa aire. Kun iparayo nin Diyos magtalikod ka sa kinaban, goodbye Philippines, goodbye pa sa aire.


Kun miyembro ka pa sa laog nin sarong taon na kapot mo an KBP ID may 100 mil pesos pa an saimong babayaan na pamilya. Pero kun dae ka na miyembro asin dae nakabayad nin annual dues mayong mareresibe an mawawalat mong pamilya.


Kan panahon na idto poco mas o menos 4 na dekada na an nakaka-agui sikat an announcer lalo na an mga lalaki ta dae bale bakong halangkaw an sweldo pero sikat, tingag an payo asin hakag-hakag kun naglalakaw sa tinampo ta popular, sikat asin pighahangaan kan publiko orog na kan mga kababaehan.


Kan panahon nganing idto may mga announcers asin DJs na an sweldo salapi sana an sarong oras pero okey lang, medyo orgolyoso pa.


Bihira pa kaidto an regular an sweldo asin regular na empleyado. Kun mainitan pa kan manager o kan may saderi remate. An mga estasyon kaidto kan radyo anas pa AM asin nagkakapira pa sana. Alagad an mga announcers hali sa manlaen-laen na estasyon dae nagtitirinohan maski magkasarabatan sa tahaw nin tinampo.


Igwa man kaidtong sikat na announcer na sa sobrang kanalian asin hambog na pasan an transistor radio kun namamasyar sa centro.


Huli ta takot sa KBP an mga announcers turultulon kaidto.


Igwa man mga komentarista na bayad an pag-programa sa aire, sponsored nin mga politiko o kompaniya nin mga negosyo pero dapat accredited kan KBP tanganing makataram sa atubangan kan mikropono.


An mga announcers kaidto apuera kan bantogan sa ciudad, sa provincia asin kataraid na lugar pigtatakutan kan mga politiko kaya sinda inaamigo, pinapakakan sa restaurant, pinapainom, pinapa-biyahe pa Manila o pa Legazpi nin libre.


May plaka pa kaidto na pinapatugtog sa mga programa kaya an mga recording companies asin mga parakanta arog ki Imelda Papin nagtatao nin sobreng may laog nin kuarta nganing patugtugon an plaka ninda.


Nagbago an timplada kan brrodcast media kan dekada 80 poon kan maki-aram na an mga politko asin pigdidiktahan na an mga brodkasters pero sa ibong na lado medyo haralangkaw na an sweldo.


Magpoon kaidto lalo na kan katangaan kan dekada 70 nagka-igwa na nin FM station sa Naga na puro tugtog asin musika an madadangog. Kan katangaan kan dekada 90 nagka-igwa na nin FM station alagad pigpunan kan RMN DWNX an AM programing sa FM station asin an haros gabos nagsurunod sagkod ngonyan.


An problema ngonyan bihira nang magtao nin accreditation exam sa mga local announcers asin renewal kan saindang accreditation kaya mayong seguredad an hanapbuhay asin pamilya ninda.


Marhay ngani ta ibinalik ni Ron Enon an KBP Community Advisory Board kaya may nag-aabiso na sa mga taga-radyo kan tunay na sentemiento kan mga tao.


KBP Manila nata ta siring? Ano na an nangyayari satong mga taga-broadcast media?


Dangog ko pakatapos kan Induction kan KBP officers and members ngonyan na taon magkaka-igwa nin re-programing an gabos na estasyon. Tiempo politika na kaya asin may mid-term elections sa 2025.


Naririsa kaya na kadaklan kan mga brodkaster may kinikilingan, risa pati na may nakaka-jackpot hali sa kamot kan mga politiko.


Pati basketball may politika, pati mga pabantulin may politika, pati mga patara-tara kan Kristmas asin bagong taon may politika.


An iba man sobra an commercial spots kesa bareta o musika, an iba man risa an may sadering kompaniya nin mga tindahan o bulong iyo na lang an nadadangog kaya nauuyam na an mga paradangog asin tibaad barayaan na ninda an radyo.


Sabi ngani kan sarong announcer mismo, an survey ngonyan na mas gusto kan para-antabay an musika bako an platika.

Comments


bottom of page