Buhay Pa An Yamashita Treasure

Garong gayong totoo man nanggad an Yamashita Gold Treasure na iyo ngonian an pinag hahanap kan mga treasure hunter ta ini, dai daa nadara ni General Yamashita pasiring duman sa Japan kaya itinalbong ini sa mga sekretong kabukiran sa pilipinas sa paglaom na balikan na sana sa panahon nin peace time. Sa ginibong open mic o orolay olay kan grupong Sumaro Bikolnon, saro sa nag attender iyo an sarong negosyante sa Naga na bisto sa linya nin Restaurant. Igua daa siyang experiencia sa mga pagkalot asin patago na pag hakot kan mga bulawan ta nagkakapera sa saiyang mga amigo duman sa katagalugan asin Bisaya an nag istorya saiya kan personal nindang nahiling na pag mina asin pabalik balik na paghugpa kan helicopter na iguang pig kakarga na mga sako asin dai nanggad pig tutugutan na mahiling kan mga tawo. Sa saindang pag tantya iyo na idto an Yamashita Treasure. Dinagdag pa kan negosyante, na dai niya mababasol an mga bikolanong treasure hunter na magpara sarakat sa Mt. Isarog asin sa may parting tinambac ta igua daang ipinag lubong an mga hapon durante kan WW2. Pero si gurangan na treasure hunter sa Naga, dara kan kagurangan sinda maluluya na asin an iba nag humali na sa kinaban. An gustong maaraman kan negosyante kung siisay digdi sa Naga o Camarines Sur an may saray kan mga mapa kan pig lubungan kan mga bulawan. An mga treasure hunter minsan nag uusar nin esperitista tanganing kaulayon an mga kalag kan mga gadan na soldados hapones asin hapoton kan Yasmashita Treasire. Saro daa sa kalag an nag tuga na iguang ikinalot sinda sa parte kan Cadlan Pili, kung kaya an mga treasure hunter sige an ara aligid sa barangay Cadlan. May nagpalakop na treasure hunter na tubong Burias an personal daang pig sabi saiya kan esperitista na duman sa lugar kan Cadlan, nahiling daa kan esperitista an sarong soldados na hapon, na iguang kaulay na joven asin magayon na daraga na taga Cadlan. An hapon iyo an bantay kan Yamashita Treasure na kan panahon nin giera, ini sige an pang elosyon nin mga daraga sa Cadlan, asin puedeng igua ining naakian sa lugar kaya igua nin nagkakaperang singkit sa Cadlan, pero nungka nindang nakua an bubon na may laog nin mga bulawan.