Buhay Sa Bokatot

Ang buhay sa Bokatot, tunay na maogma asin magayon na experiencia. Ang bokatot sarong palakaya sa San Miguel Bay na naging Famoso kan mga inot pang panahon sagkod ngonian. Iyo ini an sarong klase nin pagsisira na nag uusar nin ilaw arog kan Petromax tanganing ma attract ang mga sira na magrani sa ilaw kaya magayon ang pag bokatot kung dolom asin mayo nin bulan, ta kung iguang bulan, maliwanag ang kadagatan asin dai madulok ang mga sira sa tongod kan petromax. Duwang persona ang nag istorya kan saindang buhay sa bokatot, ang inot iyo si Gil de la Cruz, tubong Barcelonita , Cabusao asin ngonian saro nang popular na radio announcer sa OK fm asin may programa sa amay na pagka aga na an titulo Birahe Chachahe. An saro man na may magayon na experiencia sa bokatot iyo si Joel Borja, tugang na matua ni Tinambac Vice Mayor Ervin Borja, asin sarong miembro kan Kantong Putikon. Kaidtong mga dekada 70, haros magkasabay sinda Gil asin Joel na nagtatrabaho sa bokatot sa San Miguel Bay, alagad dai man sinda nagkakasumpungan ta harayo ang saindang mga distancia, ta an pagbiyahe nin lantsa hale sa saindang pangpang pasiring sa tahaw kan dagat haros kulang nin sarong oras. Sigun ki Gil, kan siya naka istar sa harong harong o opisina kan bokatot sa katahawan kan dagat, an pirme niyang kaulay iyo si Big Boy, iyo iyan an bansag sa dakulang butanding na nag iistar sa San Miguel Bay. Si Big Boy pirmeng nag tatambay sa saindang bokatot ta pig papara sopsop sa dakula niyang nguso ang mga balaw, kaya ini pig papakiulayan ni Gil na mag rayo asin nag ngingisi ngisi na naglalangoy parayo si big boy. An oficina ni Gil sa bokatot kumpleto sa gamit , igua nin radyo tanganing magdangog nin nin mga dedication sa paagi nin surat sa koreo. An parati niyang panira iyo ang kanoos o pusit, na pig aalsoman sana nin lemonsito asin dai na pig luluto. An mga darakulang sira arog kan lapez asin pampano,iyan saiyang pig aasal sa oring na bakawan. Maorogmahon sindang mga empleado sa bokatot ta sige ang saindang irestoryahan tungkol ki fpj, Dolphy asin ki James Bond. Maogma an trabaho sa bokatot pero panginot man giraray niyang pangitorogan an makaistar asin magtrabaho sa Naga City asin iyan saiyang naguno ta saro na siyang sikat na Radio Announcer. Si Joel Borja na propriong taga Filarca Tinambac, gikan sa marhay na familya nin mga Tuy asin Borja, alagad walo sindang magturugang kaya kaipuhan niyang magkayod sa joven na edad tanganing makatabang sa saiyang ama na si Tiyong Pekto na sarong maestro asin coach sa kawat na Softball. Sa pagtrabaho ni Joel sa bokatot, sindang mga empleado yaon man sa sarong harong sa tahaw kan dagat asin ang saindang gibo iyo na ihawas ang pangke sa tongod kan petromax. Magayonon helingon ang mga kadakol asin darakulang sira na nag pipiritik pitik ta buhay pa. An parating pig lalaen ni Joel tanganing lutoon kusido sa bokatot iyo ang sira na Pa’kan ta ini tunay na manamit, ang pugapo man saindang pig aasal asin ang pusit saindang pig rarangot buhay basta idotdot sana sa patis na may lemonsito. Sa pagka aga, asin papule na sinda sa Tinambac, ogmahon an saiyang familya ta dara ni Joel an kadakol na darakulang sirang Abo, tabangongo, pugapo, pampano asin kadakul pang iba. Kung ngonian deficil an magbakal nin sira sa saodan , puwes kaidto, Sagana sinda sa darakula asin masisiram na sira ta ang San Miguel Bay iyo ang dagat na kadakol nin klase nin sira. Sa tahaw kan kadagatan, nabilog ang saiyang pangitorogan na makapag tapos nin pag escuela sa Ateneo asin Unc sagkod na nagtrabaho siya sa sarong dakulaon na American Dairy Farm sa Saudi Arabia. Dai nag haloy an saiyang familya nag istar na sa Amerika, asin ngonian na saro na siyang retirado, maogma siyang nag aasikaso kan saiyang farm sa Mananao asin makaibahan an saiyang familya sa panginginot ni Mama Oying. Iyan an magayon na experiencia sa buhay sa Bokatot.