Buhay Sa Kantong Putikon

Kantong Putikon, bako man talagang yaon sa kanto kundi yaon sa bungad kan SM asin bako man talagang putikon, medyo igua sanang botogon asin maduros na kaulay alagad tunay na maogmag pag tiripon nin mga Naguenio na ang kada saro iguang ikim ikim na istorya o pang intriga. Nakakamundo sanang pag isipon na igua nang mga personalidad an dai na nahihiling sa kantong putikon ta igua nin nag humali na dara kan helang asin dara nin kagurangan. Ang kantong putikon garo man sana sarong komunidad na padagos nag babago an hitsura asin an mga lalawgon kan mga tawong yaon digdi. Ngonan na mga panahon, an mga mahigos na mag “report for work” iyo sinda, Alex Parfan, SM Ron Enon, Konsehal Ervin Borja, Ernie Verdadero, Jimmy Obiedo, Ret. Judge Joe Dy, Joe Dialogo, Joe Grageda, Gabby Casimero, Christian Sto. Domingo, Andres Bonifacio, Mayor Pilapil, Jenis Nidea, Atty. Nestor Barbosa, Nilo Aureus, Bert de los Martirez, Darius Bequillo, Tess Banares, Historian Danny Gerona, asin dakul pang iba. Maabot an panahon, an Kantong Putikon, magiging saro sa magayon na tradisyon nin mga taga Naga ta iyo ini magayon na kauigalian nin mga tawo sa sarong kumunidad na nag titiripon tanganing mag ribayan nin mga koro-koro. Kan sarong simana, nadangog an istora ni Ret. Judge Joe Dy na siya palan gusto kutanang maging sarong doctor kaya lang limitado an pig akseptar na enrolment sa University of Sto Tomas, kun kaya nag desisyon siyang mag kua nin abogacia sa sikat na UST. Sa tahaw kan orogmahan, ngirisihan asin tsirismisan sa Kantong Putikon, nag abot si Historian Danny Geroma bitbit an duwang libro, an saro tungkol sa history kan banwaan nin Tigaon, asin an saro iyo man an history kan banwaan nin Goa. Si Danny iyo an pig komisyon kan LGU tanganing gibohan nin libro an mga agi agi aki kan Tigaon asin Goa, ini an mga banwaan sa Partido na minsan pang nabisto kan panahon nin kastila ninhuli sa yaman sa Abaca asin kakahuyan. Sa pag ribayan nin mga istorya, mina kupsit an mga kasubahan, arog kan sinabi ni Sm Ron Enon, na an mga gurang daa sa Lagonoy iguang naaraman na istorya kun ta’no ta inapod ining lagonoy, kaidto daa kaya may namara-para sa lugar mom duwang Kastilang bakla sagkod na naghoros ang orolay sa Kastilang “Bagla” na pig reklamo kan mga kataraid sa Palestina ta ini naglalakaw lakaw sa natad kan harong na naka “brief” na maluya ang garter kaya waralwal an pagkasulot kaini na tunay nagtataong takot sa ibang matrona na nakakahiling. Makonsuelo an orolay sa kantong putikon ta poros kaogmahan asin mayong aranggotan maski pa sa tiempo nin pulitika. Yaon sa kantong putikon an mga personalidad na iguang naiibang karakter arog halimbawa kan sarong taga media na haros kadugo asin pinsan an mga bistadong tawo asin saro na diyan si dating FL Imelda Marcos. Igua man sarong personalidad na seryoso an dating asin an parating pig sasabi sa mga bagohan sa media iyo an ugaling pag basa tanganing maging madunong asin matalento. Sa kantong putikon ko liwat nasumpungan matapos an haros apat na dekada an dati kong kaibahan sa Station DZHN na si Gabby Casimero. Duman ko saiya naaraman na an saro sa dahilan kaya dai siya nagpadagos na maging announcer sa DWRN ta mas hinahanap palam ni dating SM Celso Baguio an propiong bikol ta si Gabby purong tagalog Manila. Kaya imbes na mag konsentrar sa radyo, napadalagan si Gabby Casimero sa Barangay Carolina ta pig bayaran siya kan City para magtukdo nin Drama Acting sa mga soltero asin daraga na gustong maging artista sa pelikula. Sa tahaw kan ngarakngakan sa Kantong Putikon, bigla an katuninongan kun mina tanog na an oras na alas sais nin bangui, ta si Joe Grageda matindog na asin mapa aram ta naging panata palan kaini na magpuli tuyong mag repeke na an oras na alas 6 nin bangui. Maski ano pa man, an buhay sa kantong putiko, tunay na maogma, kaya kami nagtutubod na ini magdadanay sagkod pa man. Maabot an panahon, an kantong putikon magiging sarong institusyon na itutukdo sa mga escuela asin an satuyang mga kaakian asin makuapo iyo an masunod na mabuhay kan maogmang kaiugalian sa Kantong Putikon. Ako nagtutubod na maabot an panahon sarong libro an isusurat sa lenguaheng bikol na an kober kaini haon an drawing nin tiripon nin tawo na buruka an mga nguso sa kangingisi na sa atubangan igua nin nag aasong tasa nin kape.