top of page

Burabod Nin Mahamis Na Tubig



Dai nanggad maipaliwanag ni Pay Enciong kung ano an yaon sa ugat kan sarong burabod nin tubig sa sarong gilid nin bukid sa kostal harani sa Lalawigan, duman sa Mercedes. An burabod iyo an paboritong hapitan para mag inom nin tubig kan mga para sira sa San Miguel Bay. Si Pay Enciong edad 66 anyos, saro nang lolo nin mga asensadong mga aki asin makuapo sa sarong magayon na harong sa Deca. Kan aki pa si Pay Enciong, duman siya nagdakula sa banwaan nin Cabusao sagkod nag soltero siya na an hanapbuhay kan familya iyo an pag sisira sa San Miguel Bay. Nakapag trabaho na siya sa Bukatot, sa Basnig asin sa mga palutang sagkod sa pag banwit nin manlaen laen na sira sa kadagatan. Saro sa naka ugalian kan saiyang mga pag iriba iyo an magpahingalo sa sarong pang- pang nin mga gapo sa direksyon nin pasiring sa Lalawigan Mercedes duman sa Camarines Norte. Duman nag iinom an mga para sira arog ni Pay Enciong ta an nagluluwas na tubig, mahamis asin malipot. An tubig pareho an namit kan softdrink na 7-Up kaya, an mga nagduduruman iguang balon na brojas, galleta o kraker ta an tubig masiram sa mirindalan. Kan mag soltero na si Enciong, nagpa aram in sa saiyang mga magurang tanganing maghanap nin ibang trabaho sa Ciudad nin Naga. Kaya nagtugot an saiyang Ama na mag adventure si Enciong sa Naga ta, maluya an palakaya ninda sa San Miguel ta napeperwisyo sinda sa presencia kan mga darakulang butanding. An mayor na hanapbuhay kan familya iyo an mag sarap nin saradit na pasayan na gigibohon balaw. Kaya lang an palna nin balaw, nauubos kan butanding na pag hamilon, mala ta saro sa trabaho ni Enciong iyo na bugawon an mga butanding. Saro siguro idto sa dahilan kaya nagtampo an mga butanding asin nag evacuar sa Donsol duman sa Sorsogon. Nasiraman si Enciong sa puerteng doros sa Centro kan Naga na an mga tawo mga “milyonaryo” asin magagayon. An premirong surat na saiyang ipinadara sa saiyang magurang duman sa Cabusao nagsasabi na nakalaog siya komo Janitor sa sarong oficina. Magayon an mga sinasabi sa premirong surat niya sa Cabusao ta digdi niya nahiling sa Naga an magagayon na mga awto asin digdi niya nahiling an mga pelikula ni Johnny Montiero asin ni Manuel Conde sa paagi nin madiklomon na sinehan. Kaidto kaya nakakadalan sinda nin sine sa paagi kan Darigold na libre an pasine-sine sa natad kan escuelahan. Digdi na nagkaigua nin familya si Enciong ta naka pangagom nin sarong magayon na daraga na tubong Tierra Nevada asin nagtatrabaho bilang servidora sa sarong Carenderia sa 2nd floor kan Supermarket. Si Enciong nagkayod nin Trimobile asin naging driver nin truck kan sarong softdrink company. Harayo sa saindang buhay duman sa Cabusao, an 8 aki ni Pay Enciong anas nakapag tapos nin kolehiyo may mga estableng hanapbuhay, iguang nag iistar sa Canada, Japan, Brisbane, Davao, Saudi asin digdi sa Naga City. Si Pay Enciong dai nanggad nakakalingaw na mag istorya kan burabod nin mahamis na tubig sa San Miguel Bay ta dai nanggad nadiskubre an ugat kaini kun ta’no ta ini mahamis asin masiram. Ninhuli ta mayo na mga nag iistorya kan tungkol sa burabod, nagtutubod si Pay Enciong na mahamis na burabod, nawara na asin dai na masumpungan. Kun ini kutana yaon pa, siguradong ini pag aadalan nin mga siyentista asin puedeng pag kuanan nin bulong sa sarong kahilangan.

Comments


bottom of page