Burokasan nin klase sa public schools pigtalaan sa Agosto 22

Bako nang Septiembre envez sa Agosto 22, 2022 an burokasan nin klase sa mga public school para sa school year 2022-2023.


Ini base sa pinakahuring memorandum na pig-isyu kan opisina sentral kan Departamento de Edukasyon (DepEd), sabi ni Regional Director Gilbert Sadsad.


Alagad dai pang kasegurohan kun ibubuelta na an full face-to-face classes sa tahaw kan dai pa nahahale an problema sa coronavirus disease. An limited face-to-face classes nagpapadagos sa mga lugar na nasa lindong kan Alert level 1 and 2.


Nakabuelta sana an in person classes sa Bicol kasunod kan pagbaba sa Alert level 1 asin 2 mientras na limitado an naglalaog na estudiantes nganing masunod an social distancing base sa direktiba kan national IATF.


Sa ngunian sa kalendaryo kan DepEd an mga graduation exercises pigtalaan sa ika-duwang semana kan Hulyo mantang masara na an klase sa huring semana ngunian na Hunyo 2022.


An opisina sentral nagtugot na sa graduation exercises alagad kaipuhan implementar kan mga escuelahan na nasa Alert level 1 and 2 an ‘‘limited face-to-face graduation’’, sabi pa kan DepEd.


Estrictong nag-iimplementar an mga escuelahan kan health protocols asin dai puedeng makabuelta sa in-person classes kun dai aprubado kan lokal na gobierno.


An Parent Teachers Association (PTA), ipinahayag na saindang pinapaboran an pagbuelta sa classrooms kan mga estudiantes huli ta disbentaje an mga online classes maging sa modular learning. (dpa)