CADENA DE AMOR

TIgsik ko an turog na masa

Kinargahan nin pulvora

Luminobag, nag-alsa

Nagparakpatak, nagrebenta!

Tigsik ko an banwaan ni Juan

Nagpaparahanap nin Superman

An nagbutwa nakaparibaraw

Ano siya, kakampi o kalaban?

Tigsik ko si Uncle Sam, si Juan

Kaito pa, mag-amigong hilaw

Pinaonan nin dolyar si Juan

Nasiod, si Juan naleogan!

Tigsik ko an Aldaw kan Obrero

Nag-init an daghan, an sentido

Nagdaguldol, kikilat, nagkalayo

Panggang na daga, nagin impiyerno!

Tigsik ko an patakot sa uma

Nakabantay, banggi hasta mag-aga

Parakit an gubing, bulwat an mata

May agilang nakatugdon sa abaga!

Tigsik  ko an cadena de amor

Ibinala sa puro kan kanyon

Puminutok, puminurak, mahamoton

An nakaparong gabos nakahuyom!