Camarines Sur igwa nang 1.2-M votantes - Comelec

Sa Septiembre 30, 2021 iyo na an huring aldaw kan voters registration, an Commission on Election (Comelec) sa Camarines Sur nagpahayag sa pinakahuring hearing ninda kan Election Registration Board (ERB) igwa nang 1,227,203 rehistradong votantes an provincia para sa eleksyon nasyonal asin lokal sa May 9, 2022.


Puon kan 2019 hasta kan Agosto 24, 2021 an 35 mga municipalidades asin duwang ciudades sa Camarines Sur naka-rehistro na nin 193,070 asin naabot ninda an target kan numero kan nagpapalistang votantes na pigmamando kan saindang opisina central, sabi ni Provincial Election Supervisor Noriel Badiola.


Nagpaluwas nin aviso sa publiko an Comelec Camarines Sur na dai na matao nin extension kan voters registration an saindang opisina central envez pinalawig si oras kan saindang opisina puon alas 8:00 nin aga hasta alas 7:00 nin banggui asin igwa pang Sabado puon alas 8:00 nin aga hasta alas 5:00 nin hapon.


Sinabi pa ni Badiola na nakatabang sa sainda an mga ginigibong satellite registration sa mga barangay sa tabang kan mga opisyales de barangay.


An nangyayari kun dai sinda naluwas sa barangay hababaon an nagpapalista sa Comelec Office na inaabot sana nin 20 hasta 30 cada aldaw alagad kun sa satellite registration dakul an nagpapalista puon 100 hasta 120 na mga calificadong votantes.


Halangkaw na an numero kan nagpapalista alagad naghihinayang an Comelec matapos sainda nang halion an 118,615 rehistradong votantes matapos maheling sa record kan mga election officers na sinda duwang veces nang nagpalyar mag-voto.


Afuera pa kaini, saindang piglilinigan an record na si may double registration na posibleng nagbalyo nang lugar sainda nang hinahale sa listahan.


Pabor man sa commission sa paagi kan mga protesta kan nagkaperang mga pulitiko na pigcuecuestion an mga transferees na inaakusaran na double registrant nganing mahale an may intensyon sa inaapod na ‘‘flying voters’’ sa aldaw kan pirilian. (dpa)