Campanya kontra illegal logging bako lang an trabaho kan CENRO

Ni Sonny Malate

Goa, Camarines Sur --- Piglinaw ni Basil Cesar S. Camba,  pamayo kan Community Environment and Natural Resources Office (CENRO),  Goa, Camarines Sur na bako sana an pagpuho kan illegal logging an nakatukang trabaho sa oficina ninda.

Apwera kan campanya laban digdi, pigbanggit kan CENR Officer na trabaho man ninda an  pagpautob kan mga leyes dapit sa solid waste management, malinig na tubig asin duros, illegal na pagmimina, national greening program, forest management program  asin libreng pagtitulo nin daga. 

Pigtawan doon ni Camba na an mandato kan oficina ninda an pangkababsan na pagpautob kan  mga leyes asin programa  sa pagprotehir kan kapalibotan asin recursos naturales tanganing masusteniran kaini an buhay kan namamanwaan.

Dapit sa pagpatitulo nin daga, segun ki Camba kaipohan na may papeles  kan proof of ownership, tax payment, donation papers kun may donasyon na ginibo asin sketch plan kan lote.  

An libreng pagtitulo particular iyo an sa agricultural asin residential pre-patent asin special pre-patent sa daga na pagrorogaring kan escuelahan o gobyerno.

Mientrastanto, pig-ako kan CENRO Officer na sa presente, deficil an pagsimbag sa pagpuho kan actividad katakod sa illegal logging, iba pang pagpalusot nin mga productong gikan sa kabukidan asin pag-abuso sa kapalibotan. 

Nanotaran niya na apwera sa pagdakop, pagconfiscar asin pagpataw nin penalidad, kinakaipohan man an maninigong pagpagamiaw sa comunidad kan maraot na resulta sa buhay kan tawo huli sa pag-abuso kan kapalibotan. 

Pigtawan doon ni Camba na dapat masabotan na gayo kan comunidad an mga nakapalaman sa PD 705 o an Revised Forestry Act of the Philippines asin ibang leyes dapit sa  pagprorotehir kan recursos naturales kan nacion..

Katakod kan mga pagdakop kan CENRO sa mga illegalista nin kahoy, kadakol nin mga good lumber asin vehiculo an nakaimpound sa solar kan saindang  oficina na namumugtak sa barangay Catagbacan digdi. 

Segun ki Camba, an mga sakayan na ini   posibleng maibalik sa kagsadiri o ipasairarom  sa auction sale sa publico pakatapos kan tamang proceso sa husgado. An iba sa mga vehiculo na yaon sa laguerta kan CENRO nakaralapa na sana.

Pigbuyagyag pa kan CENRO Officer na pakatapaos kan TS Uwan  padagos an oficina ninda sa paghawan kan mga sanga kan mga kakahoyan sa gilid kan tinampo sa mga barangay. Ini tanganing malikayan an aksidente na posibleng maggikan digdi.

Sa pakikipagcoordinar sa barangay asin local government unit (LGU) kan manlaenlaen na banwa, ini an magean na naggigibo kan saindang oficina.

Katabang pa man digdi asin sa iba pang trabahong pigtuka sa sainda iyo an PNP, BFP, DPWH, PCA, LGUs, DILG  asin an Gobyerno Provincial sa paagi kan Sagip Kalikasan.

Apwera kan sampolong banwaan sa Partido Area, sakop pa man kan CENRO Goa an Calabanga, Canaman, Magarao asin Bombon.

Good lumber naconfiscar sa impounding area kan CENRO Goa. (Photo BM)