Campanya vs HIV sa Naga binaba na sa mga barangay
Yaon na sa mga barangay kan Ciudad nin Naga an campanya kan City Health Office (CHO) contra sa Human Immunodeficiency Virus (HIV) sa atubang kan padagos na paglangkaw kan caso.
Nag-training na sa veinte sieteng barangay kan mga miembros kan Barangay Health Workers (BHWs) nganing matukdoan sinda sa pag-aram kun an sarong residente infected na kan HIV sa paagi kan saindang cooperasyon makakatabang nganing makontrol an paglangkaw kan caso, sabi sa miembros kan media ni Ms. Grace Guevara na iyo an jefe kan HIV Testing Clinic sa CHO.
Dapat 95 porciento kan mga infected sa caso makua sa cada barangay nganing mabulong kan CHO asin matabangan an pasyente.
An BHWs cada cuarto kan taon naglilibot sa mga posibleng positivo sa helang na dapat dai ibuyagyag an pangaran nganing dai makasohan sa pagbalga kan Private Privacy Act.
Poon kan Enero hasta Noviembre 2023 igwa nang maabot sa 90 persona na positivo sa caso kumpara kan nagtalikod na taon na igwa sanang 85 sa ciudad.
Alagad piglinaw ni Guevara na bako lang residentes kan ciudad an pasyente envez hali pa sa ibang mga banwaan mantang an Ciudad nin Naga iyo an centro kan referrals kan ibang LGUs huli ta yaon digdi an testing center.
Sinabi pa nganing malikayan an helang maggamit nin condoms.
Napag-araman na nagiging bukas na an mga persona na posibleng may tama kan helang nganing magpa-testing.
Hagad ni Guevara sa publico na dai mag-alangan mag-aprubetsar kan libreng confidential HIV Testing na inaalok kan saindang opisina.
An ibang mga pasyente puedeng magpa-examin sa CHO, Bicol Medical Center maging sa Barangay Health Center ta sinda tatabangan.
An DOH Bicol saro sa saindang programa pakusogon an advocacia laban sa HIV na kadakli kan mga positivo kalalakihan.
Nagpapadagos an massive education campaign sa bilog na nasyon mantang napapabayaan ini kan manlaen-laen na institusyon nganing labanan an helang.
Sa Deciembre 1, 2023 nakatalaan rumdumon an AID’s Awareness Month mantang naglalaom an ahencia na dagos-dagos an campanya laban sa virus nganing dai na magparalangkaw an caso.