CamSur naglalangkaw naman an Covid case

Matapos nin may apat na bulan na nagkulpa an caso kan Covid-19 alagad sa ngunian liwat naglalangkaw an caso kan virus digdi sa Bicol asin an Camarines Sur iyo an nangengenotan na may halangkaw na caso base sa datus kan Department of Health (DOH) Bicol.

Sa pinaluwas na ‘‘Morbidity Week 29 report’’ kan DOH poon kan Hulyo 17 hasta 23, 2022, nagsakat na sa 313 an naikurit na bagong caso mantang an tolo sa mga tinamaan kan virus pigcoconsiderar na ‘‘severe and critical’’

Sa listahan an Camarines Sur, igwa nang 114 total na caso alagad an 52 kaini sa Ciudad nin Naga, 8 sa Pili, 6 sa Milaor, 5 sa Goa, tig-apat sa mga banwaan kan Cabusao, Libmanan, Minalabac asin tolo sa Ciudad nin Iriga, tolo sa Nabua, tigduruwa sa Bombon, Buhi, Camaligan, Canaman, Presentacion, Sipocot asin sa Tigaon mientras na tigsarong caso an Baao, Balatan, Bato, Bula, Gainza, Lagonoy, Magarao, Pasacao, San Fernando asin Tinambac.

Nagsunod an Albay 37 caso, 34 sa Catanduanes, 26 sa Sorsogon, 24 sa Masbate, tolo sa Camarines Norte.

Nag abot na sa 59,924 an total na cumulative cases sa rehiyon na igwa nang 709 pa an mga activong caso.

An sinambit na caso nasa 44.7 na an daily average cases asin 43.57 percent increase kumpara kan nakaaging semana.

Si Dr. Ernie Vera, regional director kan DOH Bicol nagpahayag na dapat sunodon kan publico an health and safety protocols.

Sa Ciudad nin Naga na iyo an may halangkaw na caso, sinabi ni Dr. Sonny Rañola an chairman kan Committee on Health sa Sanggunian Panlungsod nag-alerto man sa mga barangay na pakusogon an advocacia sa health protocols orog na an paggamit nin face mask asin social distancing.