CamSur target kan PDEA na maging drug cleared

Sa tahaw kan nagdadakul nang mga barangay asin municipalidad na declarado nang drug cleared, an Philippine Drug Enforcement Agency (PDEA) nagpahayag na target kan saindang ahencia na maging drug cleared province an Camarines Sur.

Ini an pahayag ni Mark Anthony Veray, Provincial Director kan PDEA sa Camarines Sur kan mag-atubang sa miembros kan media mantang saludo sa Bicol PNP an Department of Interior and Local Government (DILG) matapos nakua kan PRO5 an ika-tolong puesto bilang Most High-Performing Unit hali sa 17 mga Police Regional Unit sa bilog na nasyon.

Alagad dai pa piglinaw kan jefe kan PDEA Camarines Sur kun nuarin puedeng marealisar mantang dakul pang mga lugar an padagos an operasyon sa ilegal na actividad mala ngani sunod-sunod an mga nagkakadarakop na tulak droga.

Nagkapera nang mga municipalidad an declarado nang drug cleared na kinababalihan kan Bombon, Milaor, Gainza asin Magarao asin iba pa mientras an mga banwaan kan Lagonoy, Garchitorena, Cabusao anas yaon na sa proceso, sabi pa ni Veray.

An saro sa inaatubang na problema kan ahencia iyo an Ciudad nin Naga na bagsakan kan ilegal na droga mantang an ibang lugar digdi tataghan nin dorogista.

Dai palang nahaloy an Naga City Police Office asin PDEA nakaarestar nin mga suspechado sa barangay Mabulo na cantidad dos milyon pesos na shabu asin sa Cararayan labi sa on milyon pesos sa laog sana nin premirong quincenas kan Enero 2024.

Kan Febrero 1 sa Ciudad nin Iriga maabot sa P1.7-M an nakumfiscar sa duwang suspek sa ginibong operasyon sa barangay San Isidro. An mga nadakop sa Naga asin Iriga gabos nag-aatubang na nin caso sa jusgado.

Sa listahan kan Bicol PNP igwa nang 2,292 barangay drug cleared sa rehiyon.

Sa bilog na Bicol labi sa P14 milyones an nakumfiscar na droga sa bulan sana nin Enero 2024.