Candia nombrado na permanenteng GM

Hale sa duwang taon asin pitong bulan bilang Officer-In-Charge kan Camarines Sur II Electric Cooperative (Casureco II), nombrado nang full-fledged General Manager kan cooperativa si Ms. Emelita Espiritu Candia asin maagi pa sa sarong taon na ‘‘performance management contract’’ kan NEA Memorandum Circular 27-035.

Alagad an junta directiva kan cooperativa kun sa saindang ebaluasyon sa laog nin anom na bulan marhay an saiyang performance, puede nang iindorsar sa NEA kan junta nganing makahawas sa provisional period.


An nombramiento pirmado ni Administrator Edgardo Masongsong kan National Electrification Administration (NEA) petsado Abril 13, 2021 alagad narecibe ni GM Candia kan Abril 23.


An Board Resolution No. 2019-125 petsado Marso 19, 2019 kan Casureco II na nag-iindorsar ki Candia na maging full-fledged general manager, inabot nin duwang taon sa lamesa kan NEA antes nag-atid-atid na dapat magbugtak nang permanteng GM an cooperativa.


An bagong permanteng GM makakabuelo na kan saiyang desisyon sa pagpadalagan kan cooperativa.


Si Candia nagtukaw bilang OIC General Manager kan Septiembre 2018 karibay sa controvercial na dating Project Supervisor/Acting General Manager Nelson Lalas.


Sa premirong taon na pagiging OIC GM ni Candia sa haloy na nalakma sa finansyal na cooperativa nin electricidad sa Camarines Sur an NEA nagtao nin dakulang onra na nag-dedeclara bilang Triple A kan Casureco II asin mantenido sagcod sa presente.


Hale sa dating ‘‘rank and file employee’’ na nagpuon bilang secretary kan Member Service Department kan panahon ni Rolando Pante, dai nahaloy na-promote bilang Budget Officer sagcod na naging Corporate Planning Development Officer kan kaparejong cooperativa.


Kan maghale si dating PS/AGM Lalas siya tinukahan kan NEA bilang Officer-In charge.


Nawara an mga controvercia sa laog kan manijamiento sagcod na nagcooperar sa saiya an junta directiva asin mga department manager. (DPAureus)