Candle lighting sa Luzon, Visayas, Mindanao, Leni para presidente

An Bunyog Bikol (BB) nag-aandam na kan saindang VP Leni Robredo for President Movement na ilalansar sa paagi kan Candle Lighting na gigibohon sa besperas kan People’s Power Anniversary sa Febrero 24 sa Plaza Rizal, kasabay kan kaparejong grupo sa iba pang ciudades sa Luzon, Visayas asin Mindanao.

Si Atty. Ricky Tomotorgo, pamayo kan BB nagpahayag sa Bicol Mail na afuera digdi sa Bicol magkakaigwa sindang sarabay na kaparejong programa sa mga ciudades kan Davao, Cebu, Bacolod asin Manila na papangenotan kan Bunyog kan Pagkakaisa.

An Bunyog Bikol iyo an nag-inisyar kan Candle lighting digdi sa Bicol mantang napapanahon nang magkasararo nganing ipaheling an fuersa para sa unidad kan Bicolandia.

Bukas sa arin man na sektor asin ordinaryong namamanuan nganing magparticipar mantang mapuon an programa alas cinco nin hapon, Febrero 24.

An tawo nagtutubod na sa liderato ni VP Leni kun yaon na sa Malacañang magiging matagas sa paglaban sa kurapsyon na iyo an nagpapatios sa namamanuan Filipino, sabi.

ANDAYA, INANGAT MAGCANDIDATONG GOB

Mientras na pigtutulod kan BB asin Bunyog kan Pagkakaisa na magcandidatong gobernador si VP Robredo na magcandidatong gobernador alagad si Congressman LRay Villafuerte kan segundo distrito kan Camarines Sur inangat si dating Majority Floor leader Rolando Andaya Jr. kan Camara-baja na iyo an maglaban liwat bilang gobernador sa maabot na eleksyon nasyonal asin lokal sa May 2022.

Sa desperado an mga lakaw ngunian kan grupo ninda Andaya asin diputado Arnie Fuentebella nganing itulod si bise presidente Leni Robredo na pacandidatong gobernador.

Si Lougi Villafuerte, aki ni LRay asin tugang kan paluwason na gobernador Migz Villafuerte iyo an masunod na candidatong gobernador kan mga Villafuerte.

An gobernador madalagan komo candidatong congresista sa Rinconada district.