CAO matugdas Kadiwa Center
Sa atubang kan padagos na paglangkaw sa presyo kan mga mayor na produkto sa mercado, an City Agriculture Office (CAO) kan Ciudad nin Naga nakatalaan magbugtak nin Kadiwa Center na posibleng ilansar sa huring semana kan Febrero o kun dai sa laog kan bulan nin Marso 2023.
An planong ini kan lokal na gobierno kan ciudad kasunod kan haralangkawon nang presyo kan mga mayor na produkto mantang makakatabang pa sa mga consumedores asin paraoma na magiging envuelto digdi.
Si dating Consejal Julian Lavadia Jr. consultant kan CAO iyo an focal person kan proyekto matapos saiyang irecomendar sa OIC CAO asin Budget Officer Frank Mendoza na pinaboran mantang napapanahon nganing makabakal nin baratong presyo an consumedores sagcod na pinamahala sa consultant.
Sa ngunian padagos na nagpaparalangkaw an mga presyo kan produkto sa mercado asin an Kadiwa Center saro sana sa kasimbagan sa naghahanap kan baratong presyo.
Pinahayag ni Lavadia sa entrevista kan Bicol Mail na katuwang sa proyekto iyo an pamayo rehiyonal kan Angat Buhay Foundation, dating Consejal Maria Elizabeth ‘‘Babeth’’ Lavadia, Department of Agriculture, Bureau of Fisheries and Aquatic Resources, paraoma asin mga ‘‘food producers bilang mga ‘‘agripreneurs’’ na directang mapabakal kan preskong bagong aning produkto pasiring sa consumedores.
Kabali sa mga produkto na yaon sa kadiwa na haros aroaldaw ginagamit kan consumedores iyo an bagas, asukar, cooking oil, karne, chicken, preskong sira, alang na sira, mga gugulayon asin iba pang produkto agricultural.
An DA Bicol igwa nang mga Kadiwa Center na pinapadalagan kan cooperativa nin paraoma alagad digdi sa Ciudad nin Naga sa paagi kan CAO.
An Kadiwa dating pigponan kan mga nakaaging administrasyon na pinamahala sa National Food Authority alagad ngunian binuhay kan DA kan magkaigwa nin pandemya kan 2020 nganing maseguro na igwang mababakal na baratong presyo.
Nakatalaan ibugtak an kadiwa sa Organic Trading Post sa Diversion road, Ciudad nin Naga asin ini suportado kan mga paraoma na envuelto sa organic farming. (dpa)