Capitolio, DSWD tolos nagdara nin relief goods sa apektado kan tubig baha

An gobierno provincial kan Camarines Sur sa pamamayo ni Gobernador Luigi Villafuerte asin Department of Social Welfare and Development (DSWD) tolos nagluwas an saindang personajes nganing darahan nin relief goods an mga familia na apektado kan tubig baha huli kan Tropical Depression Amang.

An mga barangay sa mga municipalidad kan Baao, San Fernando, Del Gallego, Milaor asin iba pang lugar nakarecibe tolos nin relief assistance si mga apektadong familia kan nakaaging semana matapos kan calamidad.

Dawa dai pa nahupa an tubig sa mga barangay binisita tolos kan grupo kan Capitolio Provincial asin DSWD para makaabot tolos an relief goods.

Antes pa kan pagbagsak nin mga uran na naging causa kan tubig baha si Gob. Villafuerte pigmiting an mga alcalde, mga Local Disaster Risk Reduction Management Office (LDRRMO) mga pamayo kan escuelahan sa publico asin pribado para sa pag-andam sa calamidad.

An jefe ejecutivo kan provincia antes pa maglaog sa Bicol an TD nagpaluwas nin memorandum sa mga escuelahan na suspendiron ngona an klase.

Kabali sa aksyon na ginibo kan LGUs iyo an force evacuation sa kababan na lugar orog na si familia na nagsasayumang maghali sa saindang residencia na ciertong aaboton nin tubig baha.

Sinabi kan PDRRMO an halawig na uran iyo an naging dahilan kan biglaan na paglangkaw kan tubig baha asin paghuros kan tubig hali sa provincia nin Albay.

Si TD Amang iyo an premirong bagyo na nangyari sa bulan nin tag-init na Abril digdi sa rehiyon cinco. (dpa)