Caso kan ASF nagbabalik sa 3 provincia kan Bicol

Nagbabalik naman sa nagkaperang mga banwaan sa tolo nang provincia kan Bicol an caso kan African Swine Fever (ASF) asin igua nang 79 na mga ataman na orig an tinaralbong sa daga sa barangay na apektado kan virus kan Department of Agriculture (DA) alagad piglinaw kan ahencia na dai paman nakaka-alarma.

Igua nang bakuna contra sa virus na gibo sa nasyon kan Vietnam alagad nakatalaan pa sanang testingon sa ika-tolong cuarto ngunian na taon.

Sa datos kan DA Bicol hale sa mga banwaan kan Baao, dai paman sinabi kun pera an caso, Barangay Sagrada asin Anayan parejo sa Pili, Camarines Sur na igua nang total na 79, gabos sa Camarines Sur, Ciudad nin Ligao kan Albay sarong caso asin Catanduanes na dai paman sinabi kun pera na an pig-depopulate.

An Sanggunaing Bayan kan Pili, Camarines Sur nagpasar nin resolusyon na gamiton an quick response kan LGU sa pagmantenir kan mga border control sa barangay asin pag-disinfect sa mga tangkal.

Alagad sinabi ni Lovella Guarin, regional information officer kan DA dai paman nakaka-alarma an caso na madaling nacocontrol kan ahencia kumpara kan duwang taon nang nakaagi na haros nagsabay sa paglangkaw sa caso kan Covid-19 sa tawo.

Na enot kaini, nagkaigua nin kaparejong caso sa Tiwi, Albay asin Ragay, Camarines Sur alagad nacontrol tolos huli kan mga aksyon kan DA asin mga lokal na gobierno asin sa barangay.

An opisyales lokal sa mga LGUs na apektado kan virus sa hayop naghiro man tolos nganing maimplementar an check point sa pagluwas/laog kan hayop tanganing dai na maglakop sa ibang lugar.

An DA nagtataong tabang sa mga hog raiser nin P5,000 cada payo alagad limitado sana sa 20 payo kan orig na iyo an binabayadan kan ahencia asin pag-disinfect sa mga barangay na apektado kan virus sa hayop.

Pig-eenganyar kan ahencia an hog raisers na ipaseguro an saindang ataman na hayop sa PCIC insurance company mantang mas halangkaw an bayad.

Kan enot na nagparalangkaw an caso kan ASF apektado an negosyante huli ta nagkulang si suplay maging consumedores mantang nagparamahal si presyo alagad sa ngunian normal pa an presyo sa mercado.