Caso kan Covid-19 sa BMC nagbababa

Nagbababa na an caso kan coronavirus disease (Covid-19) na piglalaog sa Bicol Medical Center (BMC) puon kan Enero hasta Marso hali sa dating maabot sa sampulo alagad sa ngunian an nag-aabot na sana sa limang caso asin minsan hababa pa.


Dai paman naabot an Sinovac vaccine hale sa donasyon kan China na nag-abot sana sa BMC kan Marso 4 alagad nagbababa na an numero kan mga piglalaog sa hospital mala ngani igwa pang nauulakitan na health workers.


Sinabi ni Dr. Joey Rañola, jefe kan Infectious Disease kan BMC makakatabang an pag-abot kan bakuna asin pigpunan na an pagtudok kan vaccines sa mga medical workers kan hospital kan Viernes, Marso 5, 2021.


Sa ceremonial vaccination ceremony si assistant medical director Dr. Mary Jane Uy iyo an enot na pigtudokan kan bakuna, provincial health officer Rey Millena kan Camarines Sur asin iba pang mga medical workers mantang palihis muna si medical director Francisco Sales huli ta saro nang senior citizen.


An iba pang mga naging pilot vaccination program sa Bicol iyo an Bicol Regional Training and Teaching Hospital sa Ciudad nin Legazpi, Naga Imaging Center Cooperative (NICC) sa Ciudad nin Naga asin Bicol Region General Hospital and Geriatric Medical Center sa Cabusao, Camarines Sur.


Nagtutubod si Rañola huli sa pagtarabangan kan mga lokal na gobierno, Department of Health asin iba pang ahencia de gobierno sa campanya nganing estrictong masunod an mga health protocol dakulang bagay nganing dai magparalangkaw an caso kan Covid-19 sa Camarines Sur.


Alagad dawa na nagbababa an caso mas dapat tawatan giraray an paglikay asin magpabakuna, sabi pa kan BMC.


Sa Ciudad nin Naga, sinabi ni Alcalde Nelson Legacion na sainda nang pighahalat an pag-abot kan AstraZenica vaccines na iyo an babakalon na bakuna kan ciudad na saro sa tatawan nin prioridad iyo an health workers, frontliners asin PNP.


Sa ceremonial vaccination ceremony kan City Hall sinda Obispo Rolando Tria Tirona kan Archdiocese of Caceres, Alcalde Nelson Legacion asin Liga President Antonio ‘‘Dodith’’ Beltran iyo an mangengenotan nganing ipaheling sa publico na dapat dai matakot sa bakuna contra Covid-19.


An problema ngunian kan City Hall huli ta mayoria sa survey sa mga residentes maging Barangay Health Workers (BHW) mga ‘‘undecided’’ magpatudok bakuna.


An ciudad nagtagama nin Php50 milyon nganing ibakal kan suplay kan bakuna laban sa virus. (dpa)