Caso kan HIV sa Bicol padagos naglalangkaw

Na-aalarma na an Department of Health (DOH) Bicol sa padagos na paglangkaw kan human immunodeficiency virus (HIV) cases kasunod kan nagkaigua nang 201 bagong mga caso sa Rehiyon Bicol poon kan Enero hasta Marso ngunian na taon.

Huli kaini, nasa cuatro por ciento na sa 5,101 nailistang mga caso sa sa bilog na nasyon.

94 por ciento kan may mga helang kaini mga kalalakihan na nag-eedad nin 25 hasta 34 anyos. Poon na nadiscobre an HIV kan Enero 1984 digdi sa Rehiyon Bicol base sa datos iguang 3,398 na mga caso.

An HIV epidemic padagos na naglalangkaw na kadakle mga kalalakihan an tinatamaan na nakukua huli sa ‘‘male-to-male intercourse’’

Kina-aalarma pa kan ahencia iyo an paglangkaw kan mga nagbabados na kababaehan na nag-eedad nin 16 hasta 40 anyos na mas delicado mantang dakulang posibilidad an omboy magkaigua man kan caso.

An pagpa-testing sa awtorisadong klinica saro sa dapat gibohon kan mga may helang kaini nganing dai maglala an caso asin mahulog sa AIDS cases.

Sa Camarines Sur pwedeng magpa-testing sa Bicol Medical Center asin sa Naga City Social Hygiene Clinic na makukua sa City Health Office kan City Hall mantang sa Albay sa Bicol Regional an teaching and Hospital.

Nag-apelo an DOH sa paagi kan saindang advocacia si duda sa sadiri na igua nang helang magpa-testing tolos nganing madeterminaran kun positivo sa caso.

Nagkapera sa naheheling kan ahencia sa paglangkaw kan caso nangengenotan diyan an ‘‘easy access’’ sa pornograpiya, dai paggamit nin proteksyon sa pakikipag-sex. An iba natatakot magpa-test na naresulta sa paglala kan caso. ‘‘Early detection’’ saro sa solusyon, sabi pa kan DOH.