Caso kan HIV sa Ciudad nin Naga naglangkaw 29%

Naglangkaw nin 29 por ciento an caso kan Human Immunodeficiency Virus (HIV) sa Ciudad nin Naga kan nakaaging 2023 kumpara kan taon 2022 mantang mayoria sa mga tinatamaan taon-taon mga kalalakihan.

Sa datus kan Social Hygiene Clinic sa pamamayo ni Medical Technologist Grace Guevara, nagsakat sa 104 si caso kan 2023 poon Enero hasta Deciembre mantang sa bilog na taon kan 2022 igwa sanang 75 caso.

Binaba na kan hygiene clinic an saindang kampanya laban sa HIV katuwang an mga Barangay Health Workers (BHWs) sa 27 barangay kan ciudad nganing mas maging epekto asin maenganyar na magpa-test na objetivo kaini na mabulong tolos an pasyente.

Sinabi ni Guevera mas epekto an magpa laboratory test nin amay tanganing mabulong tolos asin dai mahulog sa casong AIDS. Kabali na sa saindang pig-eexamin iyo an iba pang manga sexual disease.

Nganing maseguro contra virus dapat maggamit nin condom. Andam magrecibe an hygiene clinic kan siisay man na interesado na magdulok sa saindang opisina nganing matabang mientras na libre an confidential HIV screening and prophylactics poon sa edad na quince anyos pataas.

Mientras tanto, sa datus kan opisina rehiyonal kan Department of Health (DOH) sa Bicol halangkaw an caso sa kalalakihan na nag-abot sa 94.08 por ciento o 2,258 mientras sa kababaehan igwa sanang 142 o 5.92 por ciento alagad bako pa ining sa bilog na taon 2023 envez sa bulan nin Enero hasta Hunyo 2023.

An DOH nagsabi sa paagi kan health habit asin kan practice safe sex dakulang bagay magin an mga advocacia na dapat gibohon kan mga opisyales de barangay.