Caso kan rabies sa Bicol, liwat naglangkaw

Liwat naglangkaw an caso kan rabies sa Bicol apesar na gabos na mga lokal na gobierno iguang ordinansa na nagbabawal sa pagbutas nin ataman na ido.

Sa pinaluwas na report kan Department of Agriculture sa paagi ni Karl Robert Ador, DVM Agriculturist 1 Coordinator ngunian na taon naglangkaw na sa 76 na casong mga nagpositivo sa rabies sa bilog na Kabikolan kumpara kan taon 2023 iguang 68 an naikurit sa mga nagpositivo sa rabies na ataman na hayop asin 24 mga tawo an binawian nin buhay.

An Camarines Sur iyo an may halangkaw na caso na nag-abot sa 36, 31 sa Albay, 16 sa Sorsogon, 4 sa Camarines Norte asin zero sa Catanaduanes.

Nagpatanid an DA sa gabos na nag-aataman nin hayop siring kan ido asin ikos dapat maging responsable tanganing dai makadisgracia an saindang ataman na hayop.

Sa pangapodan na dapat dai pabayaan an saindang ataman na hayop na burotas sa tinampo maging sa iba pang kalye nganing dai maulakitan nin rabies virus asin kaipuhan pabakunahan cada taon.

Dakul nang nag-aatamang na haros saindang kafamilia an hayop na tinatawan nin masustansya asin malinig na bahog alagad igua pa giraray na nagiging pabaya an nangyayari iguang mga nabibiktimang makagat na tawo.

Bako lang LGUs an may ordinansa kontra sa butas na ayam maging barangay council alagad igua pang pabaya sa ataman na hayop.