Caso kan rabies sa Ciudad nin Naga nababa, nalangkaw

Nalangkaw nababa cada taon an caso kan rabies sa Ciudad nin Naga alagad kontrolado an pagparalangkaw kaini sa tahaw kan mga ginigibong programa kan City Veterinary Office kan lokal na gobierno.

Si Dr. Junius Elad, jefe kan City Vet kan City Hall nagpahayag kan taon 2022 iyo an may halangkaw na caso na nag-abot sa doce, nagbaba kan taon 2021 sa pitong caso asin ngunian na taon 2023 poon Enero hasta Noviembre igwa sanang apat na caso asin saro digdi an human rabies.

Dawa dakul naaanggot sa saindang ginigibo padagos an saindang trabajo sa pagsiod kan mga burutas na ido sa mga barangay na dapat balokaton kan mga kagsadiri alagad igwa nang penalidad base sa ordinansa kan lokal na gobierno, sabi pa kan City Vet.

Apesar na igwa nang ordinansa an City Hall na dapat laomon o gakodan an saindang ataman na hayop igwa pa giraray sindang nagkakadarakop sa mga barangay.

Hagad man kan opisina an cooperasyon kan opisyales de barangay na ipadagos an advocacia laban sa rabies sa paagi kan estrictong pagbawal sa mga butas na hayop.

Nagpasalamat man si Elad sa mga pagtaraid na LGUs maging sa ciudad sa cooperasyon kan saindang mga programa. Kabali sa saindang proyecto iyo an pagbakuna contra rabies, pagkapon nganing dai magparadakula an populasyon, nagkaigwa pa nin film showing contra sa rabies na ginibo kan nakaaging rabies month.